黃德斌認做裸模 謙仔冇人吼

男藝人拍攝裸照近日令圈中人議論紛紛,成為城中話題,多名身形健碩的男藝人對此表述心聲,羅仲謙表示絕不貪錢,高鈞賢自認保守,袁偉豪及黃德斌則表示只曾擔任裸體畫模特兒。

富家子涉以裸照恐嚇及非禮男藝人一案昨日開審,鑑於事件涉及數名男藝人,圈中人議論紛紛,令人關注藝人拍裸照是否已蔚然成風,據知的確有TVB男藝人曾拍下性感照,但有部分是男藝人自願或主動要求,故未必構成刑事成分,但事件已令一眾有拍過的男星人人自危,感到後悔之餘,亦擔心照片終有一天會流出。

近日,圈中人對此風氣議論紛紛,多位男藝人昨日紛紛作出回應。有「巨胸謙」之稱的羅仲謙表示沒有拍過類似照片,更不會出席「飯局」。他表示當年做救生員時「瘦蜢蜢」,應該不會被人睇中,亦否認收入拮据:「當時救生員收入好高,但我覺得唔係錢嘅問題,係修養問題,我唔會做呢樣嘢,亦冇影過呢啲相;錢方面我一直靠正當職業搵番嚟,我唔係咁物質(主義)。我入行係因為當年陪朋友去我依家嘅公司Casting電影。」

高鈞賢:我好保守

05年及07年港男冠軍高鈞賢及袁偉豪亦異口同聲表示沒有拍過裸照,高鈞賢說:「選港男嗰陣要着泳褲,我都冇剝晒衫啦!當時我好保守o架!就算依家都唔會影,又唔係大隻過人!」

袁偉豪表示只曾於入行前為學生擔任人體素描的模特兒:「當時都未正式加入TVB,但影相就一定唔會。」

大隻猛男黃德斌表示沒有人撩他影裸照,笑言「可能都唔係咁Fit」,但多年前曾為外國藝術家擔任裸體畫模特兒:「未埋位時有圍毛巾,到真係畫就拎開,但唔係正面,只係側面畫人體線條。」

文:影視組