乖仔送錶陪食飯 城媽聞Lynn笑騎騎

「富黛戀」發展多年，城城雖然一直未肯公開承認與熊黛林（Lynn）的戀情，但兩人早已被外界認定一對，直至近年，兩人關係愈見白熱化，已達談婚論嫁階段，感情穩定。

Lynn昨晚回家時沒有回答記者的提問，但仍有禮貌揮手。	吳國敬	城城向記者展示送給母親的手錶。

前日母親節，城城於晚上8時許，撇下女友Lynn單拖現身銅鑼灣一間酒家，會合媽咪及一眾親友食飯慶祝。身穿白Tee、牛仔褲的他，被問到送甚麼禮物給媽咪時，向來cool爆的城城面帶笑容表示：「送手錶。」之後他便進入了酒家內的VIP房，當經過其他客人旁邊時，引得場內食客都抬頭眼望望，而城城亦禮貌地跟眾人微笑點頭。

風騷拖母代擋駕

逗留兩個多小時後，城城搭住媽咪膊頭步出，同時間又見吳國敬與友人食完飯離開，問他們是否一齊食飯？城城說：「唔係，咁啱見到，呢度（指酒家）係我好朋友。」心情靚爆的城城，邊行邊捉住媽咪隻手，展示媽咪手上的手錶，示意是他所送的母親節禮物。問到點解唔同埋Lynn食飯？城城笑笑口說：「唔識答，唔知點答你。」而當城媽聽到Lynn的名字後即笑騎騎，並表示自己唔識講嘢，不懂回答。此時，城城幫口說：「佢哋循例問下啫，循例問下啫。」之後眾人齊齊搭升降機離開。

雙方經理人否認

另外，最近有報道指Lynn的父親不幸患癌，並指原定兩年後結婚的二人，將婚期提前至六月在澳洲註冊，為Lynn父沖喜。昨日本報致電Lynn經理人Kim求證，Kim表示：「六月結婚唔係真嘅。」提到會否在今年內結婚，Kim語帶含糊說：「Lynn總會有一日結婚，係咪年底就真係唔知。（Lynn父是否有癌病？）私人事唔想講。（結婚沖喜？）老人家嘅私人事唔講喇！」對於女友Lynn父親被傳患癌，城城透過經理人小美表示不作回應。問城城是否與Lynn六月結婚？小美說：「總之城城六月嘅工作排滿咗，城城亦冇向公司請假。」

文、攝：追蹤組