Kay無償解約 賺咗層樓
謝安琪（Kay）與環球提前解約擾攘多個月，她昨日出席活動報喜表示與環球達成協議和平分手，當中不牽涉賠錢成分，強調沒有「嘔突」贖身，而環球為放Kay一馬，不需要她賠合約費用，只要求她歸還近七位數的墊支費用。
Kay昨日以師姐身份出席組合goldEN加盟金牌大風記者會，她甫見記者即表示有好消息宣布，她說：「尋日（即前日）收到Duncan（環球高層黃劍濤）電話，大家達成和平協議，唔牽涉賠錢成分，依家仲有啲手續未處理，所以會尊重合約精神。」Kay強調在是次的解約糾紛期間，並沒主動接觸其他唱片公司，反而有多間唱片公司向她招手。
接受夫妻檔合作
Kay又透露與環球傾解約過程很健康：「傾嘅過程要尊重大家，唔想影響結果。（唔使賠錢變相加盟其他公司有錢袋？）係o架，係開心事。（啲錢鬆動咗？）冇變過，如果係外間所傳嘅數字真係成層樓。（賺咗層樓？）有咁嘅可能。（以為你嘔突？）冇。」對於外傳她過檔金牌大風，Kay不置可否說：「金牌大風係間好嘅唱片公司。（同老公張繼聰夫妻檔？）冇呢個考慮，但唔抗拒。」Kay強調解約條款很公平：「互不拖欠。」
歸還百萬墊支費
環球唱片董事總經理黃劍濤（Duncan）昨日透過發言人說：「其實唔係唔使『賠錢』，有啲墊支費用係要畀番環球。」他稱事件是Kay經理人夏森美與環球的事：「唔關Kay事，大前提係藝人可以搵到食，所以希望盡快解決件事，希望Kay將來有好發展。」據知，環球為好來好去，只要求Kay歸還墊支的七位數。
此外，金牌大風行政總裁李文偉昨日承認曾找Kay過檔，他說：「首先要佢搞掂同環球嘅事。（有信心？）做事要有信心，希望可以同Kay合作。」
文：音樂組