翟威廉陳庭欣 太熟撻唔著
港男出身的翟威廉自當選後即參與拍攝無綫劇集，興趣廣泛的他除了樂器、舞蹈甚至是多國語言亦難佢唔到，談到感情事，直言曾與亞姐拍拖的他，對緋聞對象陳庭欣冇感覺。
外形俊朗的翟威廉性格務實，目標是當一個出色的藝人，不過他希望自己賣的不是樣子，而是多元化的演技及才能。百足咁多爪的他於語言、樂器及舞蹈等方面亦有涉獵，為了「周身刀、張張利」，於空閒時他亦努力練習：「其實好多嘢如果擺低咗一排就真係會生疏o架啦，所以都要keep住練番！」
未想上位
入劇組一年多，他自言自己的目標是在四年內當上男配角：「我依家係三、四線，希望可以上到二線，我預咗自己要浸幾年，夾硬上位都冇用，孭唔起、做咗收視毒藥仲慘！」
似乎是緋聞絕緣體的他僅僅與和他同年當選港姐的陳庭欣傳過緋聞，不過卻令他得啖笑：「嗰次我拗柴佢扶住我行o架咋，我哋係好朋友，好難有感覺！」談及拍拖一事，他不諱言於亞視時曾與亞姐拍拖，愛得相當大方！至於往後，他就持開放態度的說：「有就拍啦，唔想閂咗自己後門，哈哈，唔好逼死自己吖嘛！」至於喜歡的類型，威廉表示：「我鍾意啲女仔識得溝通，如果可以令我屋企人都鍾意佢就最好啦！」
文：冰奇 攝：李廣成
場地：McSORLEY'S~ALE HOUSE~＠SOHO