姣爆陳庭欣醉擒謝天華
前港姐陳庭欣早前於尖沙咀被發現一臉醉醺醺，更當眾撲向謝天華又挨又攬！原來二人正拍攝新劇，一度吸引途人駐足舉機，天華不時耐心教導處女拍劇的陳庭欣。
謝天華與陳庭欣（Toby）日前為新劇《法網狙擊》拍外景，首次入劇組便要「姣媾」前輩的Toby，一roll機就醉貓上身，天華亦讚她醒目：「佢一點就明，港姐係唔同啲，證明評判眼光好！」天華在現場不時提醒Toby，對後輩非常提攜的他對於新劇多有新人參與，他則謙虛說：「其實套劇都仲有好多前輩，我係夾咗喺中間，（擔心多新人？）唔會，我擔心個天氣多啲！聽講今年會特別熱，我飾演律師要着三件頭嘅西裝，真係好熱！」
狂背超長對白
已非首次演律師的天華笑言：「啲對白長到我滴汗呀！」問到於劇中與楊怡飾演一對的他會否有親熱戲？他則大賣關子笑說：「如果有感情位，唔錫又唔好睇，觀眾都鍾意睇啲情到濃時嘅咀戲嘅！」
Toby雖只有數場戲份，但已令她緊張得在拍攝前心不在焉，演姣戲交足貨的她笑說：「初初見到咁多途人真係放唔開，但怕阻人收工；加上天華都有教我點做，不過要喺好短時間內消化！」她笑言當中最難忘在車上的除衫戲：「我唔知要就位，撞到手肘好痛！未試過一晚除咁多次衫架！」
文：冰奇
攝：黎志輝