薛凱琪:只想娛樂大家

歌而優則演的薛凱琪,好嚮往其演藝事業,但她不愛明星生活,能夠被幸運揀中進身娛樂圈,她明白要努力去換取大家的肯定,盡可能將歡樂帶給大家!

細個志願想過做畫家,但現實問題係屋企得我一粒女,如果我的畫賣得唔好,照顧唔到屋企人點算呢?所以細細個就祈禱,祈求神賜一份我好鍾意、覺得好有作為而又賺到錢的工作畀我。我覺得我真的得到了,所以好感恩,因為好多人靚過我、身材、演戲好過我,但點解會係我呢?中國咁多億人,香港亦多靚女,點解會揀中我?所以無論演戲、唱歌我都盡力,為了自己為了家人,我仲有好大責任,唔好老土到話幫人,帶到畀人歡樂都好呀!

珍惜機會

我是幸運的,這行沒有免費午餐,如果你不努力,公司點解仲要用錢投資喺你身上?點解廣告商仲要搵你代言?粉絲唔係盲或聾嘅,我可能成日笑騎騎,但我工作時好認真,其實做任何行業都沒有好彩與否,頭一次機會人哋畀咗你,之後就要睇你點去珍惜同經營。

我愛自由,亦嚮往歌手、演員的事業,但我不愛明星生活,講得娘少少,你可以不愛唱歌拍戲,但愛做明星,但做明星其實要放棄太多,連家人、朋友都有一定壓力,除非你真的好愛這樣,才會作出這樣大犧牲!

似睇醫生

我愛拍戲,因為拍戲好玩,我會投入角色去愛戲中的人,幾年冇錫過男仔,又可以拖手拍拖,又可以發脾氣掟碗碟,做到平時薛凱琪做不到的事,藉住拍戲來發洩,所以我覺得拍戲好似去睇心理醫生,將心裏面的抑壓釋放出來,不過相對唱歌,我更加愛唱歌!

有人說娛樂圈是個大染缸,但要曳要壞係睇個人的本質,最初入行都聽到好多驚人故事,但唔應該因為驚而唔去接觸,娛樂圈同任何圈子都一樣,你要壞任何圈子都壞得,圈裏都有好多好人。娛樂圈就有種特別力量,一個受歡迎的藝人,吸納到好多粉絲,代表着你有好大力量,能夠運用你的力量去做好事,甚至令負面事可以變好。(完)

後記:鬼馬番書妹

筆者認識阿Fi多年,阿Fi說話快得像機關槍,仲不時夾雜英文,因為自幼在國際學校讀書的她,英文彷彿才是她的母語,相反中文好多時詞不達意,「甩甩咳咳」,但她都會努力表達她的意思。她鬼馬地叮囑筆者可以不用寫她今年31歲,因為她「以為」好多人不知道,甚至覺得她唔似咁大喎。

口述:薛凱琪

筆錄:音樂組