圓圓撒嬌 加讚忙補鑊
「玩具大王」蔡志明兒子蔡加讚與女友汪圓圓向來甜到漏，昨日二人出席活動時大晒恩愛兼耍花槍；圓圓在記者面前向男友撒嬌，投訴對方工作太忙以致少見面，加讚即識做地冧女友，大讚對方玉手又靚又細，認真羨煞旁人。
蔡加讚昨日為集團旗下的譽一鐘錶旗艦店舉行揭幕禮，更出動五架合共價值三千萬元的名貴房車接載手錶品牌高層，而加讚舉家及女友汪圓圓亦現身支持。接受訪問時，圓圓乘機撒嬌：「佢呢排好忙，失蹤咗幾日。」問加讚有否送過獨一無二的腕錶給圓圓？他借機狂冧女友：「嗰啲錶好大隻，圓圓隻手又靚又細，唔啱戴。有年生日送咗一隻運動款嘅白色鑽石手錶畀佢。」氹得圓圓即時溫柔地向加讚說：「你好似瘦咗，（有冇煲湯畀加讚？）冇，遲啲先學。」二人大晒恩愛。
目標開68間分店
提到母親節將近，加讚表示會提前慶祝：「正日唔喺香港，圓圓都會一同慶祝，等佢負責plan。」問到家人有否催婚？圓圓答：「順其自然，專注事業先，（佢都好事業有成？）好成功，佢好有品味。」而會否達到目標才結婚？加讚坦言：「冇set，嚟就嚟，唔鍾意女友辛苦，（娶佢等佢唔使做？）圓圓自己都鍾意做嘢。（要開多幾間分店先娶圓圓﹖）依家30間，（100間？）唔使，目標太高，68間啦！」加讚透露該店花了近千萬元投資：「因為包含咗五大品牌，投資大啲，對裝修亦有要求。」
另外，加讚胞姊加怡與未婚夫Jeremy結伴到場，加怡透露將於八、九月當秋天新娘，並已預約教堂場地：「日期未知住，一日過擺埋酒。（婚紗外國訂？）唔係，牌子唔講住，哈哈。」問Jeremy加怡是否百分百好老婆？他甜蜜說：「絕對係！」
蔡志明恨抱內孫
至於蔡志明大讚兒子加讚打理事務井井有條，他說：「佢鍾意車同錶，做自己有興趣嘅事會好支持。（想唔想飲新抱茶？）梗係想，想佢哋快啲生個內孫畀我玩。」提到女兒加怡將當「秋天新娘」，他坦言不知婚禮日期，指交由他們決定。
文：名人組