薛凱琪：我係公主身奴隸命

97年香港經濟最低迷嘅時候，我屋企係其中一個受影響嘅家庭，落差幅度仲好大！當時我仲讀緊書，雖然爹哋媽咪冇講我知屋企財政出現問題，但你會感覺得到，點解我會咁錫爹哋媽咪！因為嗰段日子作為一個家庭，我相信係幾難捱，但佢哋只會慳自己，盡可能唔影響我，令我生活同以前冇分別。但我唔係蠢，屋企有事點會唔知！

19歲兼職模特兒

我19歲讀緊大學時開始做part time model，做model唔係因為覺得自己靚或鍾意做，只係朋友介紹即管一試。之後確實為錢而做，因為第一個工作就賺到四千蚊或六千蚊，由嗰時開始我就再冇用過爹哋媽咪嘅錢。當時覺得用自己錢好威，每次工作賺到錢，我都會畀一半錢屋企。拍過第一個電視廣台後，就知道拍廣告好辛苦，一個鏡頭要重複拍幾廿次，心諗拍MV拍戲咪仲弊？我睇過一個特輯，有個女藝人話整頭都要兩、三個鐘，當時我好記得仲同媽咪講：「黐線o架！你要我坐兩個幾三個鐘，打死都唔坐！」所以知道藝人唔易做，更加唔想做。但世界就係咁搞笑，之後自己做咗Artist，化一個古裝頭坐四個鐘都有，世事往往估唔到。

第一桶金夠還錢

每個屋企都會有好景或不好嘅時候，就喺我入行第一年所賺到嘅錢，已經可以平衡番晒屋企一切。但到今日我都未可以鬆一口氣，因為屋企得我一粒女，爹哋媽咪又退休，我好希望畀到佢哋一個住得舒適嘅環境。我好需要安全感，我明白我要好努力，先可以令我爹哋媽咪同自己放心。我仲有三隻貓一隻狗，要照顧好多人，我係公主身奴隸命，我成日都話我是一個會着裙同會化妝嘅男人。

口述：薛凱琪

筆錄：音樂組