梁烈唯：好困擾
無綫男藝員梁烈唯（唯唯）被傳涉及上周五發生的一宗刑事案，唯唯坦言傳聞令他大受困擾，更影響到家人，他稱欲主動聯絡警方了解事件。
唯唯早前憑電視劇《缺宅男女》「關二哥」一角建立人氣，近日卻無端捲入是非，他昨日在電話中表示：「起初我都想一笑置之，點知先傳非禮，後傳非禮加毆打，最後仲傳強姦，朋友都發短訊問候我，屋企人都擔心我，我覺得好困擾、好唔開心，怕會影響形象。其實到目前為止都冇人聯絡過我，我有考慮過親自到警局了解件事，但又唔知應該去邊間。我唔知係咪有人惡作劇，總之覺得好無辜，成件事好無厘頭。」
最近忙開劇
無綫外事部副總監曾醒明對於上述傳聞表示：「已經同咗樂易玲小姐同埋梁烈唯經理人聯絡，案件係上周五喺酒吧發生，梁嘅經理人話梁烈唯最近忙開劇，根本冇時間去酒吧，對於傳聞佢哋都摸不着頭腦，唔知點解咁傳，其實若果真有其事，警方都會搵梁烈唯或者TVB幫手聯絡梁，但到依家我哋都冇收到通知。」有傳事件涉及一名關姓女藝員。唯唯原定昨晚返電視城開工拍劇，但最終未見蹤影，有指他將於今天的新劇宣傳活動上公開回應事件。
文：影視組