薛凱琪：就當我哋拍過拖
在圈中緋聞不多的薛凱琪（Fiona），卻跟緋聞男友房祖名糾纏多時，對外間認定兩人曾經相戀，Fiona隨大家心中所想，因為覺得跟祖名一起並非甚麼丟臉的事。
緋聞傳來傳去都是房祖名、方大同，我覺得已經好好，幸好緋聞不算多。我同祖名的緋聞，連朋友都信，無論我答了千次話冇，他們都信傳媒所寫的，以前我都會嬲，因為有些人只是想聽他們想要的答案，既然如此就不要問我好了！
開心得好知己
在我們緋聞傳得最熾熱時候，我全無避忌，照跟他食飯、去街，因為我覺得點解要畀緋聞控制生活呢？我想做就會做，又不是做了壞事，當被傳媒影到相，成件事好似好真實，雖然我否認過多次，但大家依然不信，反正我又覺得無所謂，那就當我們拍過拖啦，我不覺得有甚麼好丟臉。
杜汶澤曾經講過一個理論，有些愛情片點解唔好睇，因為冇公信力，但我同祖名拍過兩部戲，拍戲時我真的愛祖名，戲裏面的愛感動到觀眾，令大家真的以為我們拍過拖又分手，香港電影圈的演員不多，要找到好演員、好拍檔更加少，身為祖名的朋友，我覺他是個好有家教、心地好好的人，這是很難得，如果跟一個靚仔但人品差的人傳緋聞，我寧願與個心地好的來傳，我開心得到祖名這個好知己，兼且電影上的好拍檔。
電影誤導觀眾
我與大同其實一樣全無避忌，我們成日出街，只是大家可能受電影的影響，潛意識覺得我同祖名好真實，但私生活裏我可能日日跟大同見面，只是大家見不到，所以我覺得觀眾是被大銀幕誤導，觀眾投入我的電影，我當然開心，但作為小巿民的心態，我睇藝人是睇他們唱歌有幾努力、演戲令我幾投入，他們的私生活如何與我無關的。
口述：薛凱琪
筆錄：音樂組