何思諺周街騰掃奶粉
「陽光妹」何思諺（Leanne）今年二月與老公Tom誕下囝囝，近日開始復工，與老公一齊搵奶粉錢，日前見她湊住兩個月大的囝囝在街頭四圍撲奶粉，手拎一大袋尿片與奶粉，力氣十足。
榮升媽媽的何思諺，年初為樂隊Mr成員阿Tom誕下兒子，一直深居簡出，經常在微博上載與囝囝的照片。近日成功修身的她，開始密謀復工搵奶粉錢，又要照顧僅兩個月大的囝囝，認真忙碌，日前便趁放假湊住囝囝出街買奶粉尿片。
囝囝「節瓜腳」
臨近傍晚時分，Leanne用揹帶湊住囝囝，見到面圓圓的囝囝肥嘟嘟，「節瓜腳」現形，不過Leanne行了數間藥房仍步履輕盈，最後未購得心水奶粉的Leanne，繼而轉戰大型超級市場。
Leanne一支箭走到牛奶貨架，看似要挑選牛奶為自己補身，之後再走到奶粉貨架，為囝囝挑選奶粉，花了數十分鐘才下決定，連掃幾罐奶粉放入購物車。大抵BB與媽媽出出入入，舟車勞頓，早已在媽媽懷中呼呼熟睡。其後Leanne再去買嬰兒尿片，揀選了數包大包裝尿片，最後推着裝滿奶粉尿片的購物車，逛足半小時才付錢離開。
好心人讓的士
Leanne手拎一大袋戰利品，可能當時正值放工時間，她等足10分鐘才見有的士，雖然身後有另一名女途人截的士，不過見Leanne抱B又拎着大包小包，好心讓她先上的士。
文、攝：專案組