陳偉霆遭圍毆 趴街噴血

陳偉霆昨日到旺角女人街拍攝英皇電影《紮職》，該場戲講述William與母親雪梨在女人街開檔，卻被黑幫收數及毆打，好友曾國祥及徐少強兒子徐偉棟到場亦被打埋一份，最後要「大佬」譚耀文出面平息。期間William慘遭打完心口打背脊及「噴血」，三人更被打到瞓地，弄得一身污糟，場面逼真，吸引大批路人圍觀，警察亦有到場了解。

冇時間睇跌打

William直言開工幾天日日畀人打，雖有戴護墊亦難免受傷：「有日畀六十人追打，打足6、7個鐘！最傷係被踢心口，都冇時間睇跌打。（叫阿Sa呵番？）男人戲實有整親，其實好耐冇見，有傾電話，但冇特別講打戲。（叫佢嚟探班？）唔好！咁血腥！」

陳偉霆以一敵二，捱打難免。	陳偉霆連日開工都要捱打，打足6、7個鐘。	譚耀文（左起）、徐偉棟、曾國祥及陳偉霆現身女人街，吸引不少師奶圍觀。

阿譚笑言已升呢做頭目，因此不用出手，他又讚William演得好：「佢角色唔惡但要有霸氣，好難演！（阿Sa探班？）未見喎！我都想仔女嚟呀！」手執紙袋的他笑言剛到附近買波鞋，因最近多在內地拍戲甚少Shopping。至於徐偉棟表示最近積極操肌及曬黑，之前亦曾向父親取經。

保安大戰粉絲

此外，譚耀文及溫碧霞前晚到鑽石山墳場拍攝《紮》片，飾演大家姐的溫碧霞笑言不怕在墳場開工：「反而係勁多蚊！」她透露日前到內地登台時突然被fans捉實，保安即衝上前與fans大打出手，釀成流血事件。

文：影視組