高鈞賢撇翠翠任蒲妹坐髀
向來形象乖仔的香港先生冠軍高鈞賢（Matthew），前晚撇下緋聞女友葉翠翠到中環夜蒲，期間即使有警察進行查牌，飲大兩杯的Matthew一於少理，繼續跟短裙女飲酒猜枚，大髀任坐，翠翠被問男友畀女圍一事即劃清界線，戀情似危危乎！
現年27歲的高鈞賢（Matthew），自05年當選香港先生冠軍後，經常獲無綫安排演出鄰家男孩角色，乖仔形象深入民心。Matthew前晚撇甩緋聞女友翠翠，與一班男女友人到中環夜店消遣，同場還有去年香港先生冠軍李晉強。
起初，戴帽的Matthew只跟友人飲酒聊天，飲大兩杯的他跟同場的短裙女猜枚飲酒，又扮鬼臉冧女，情緒高漲。期間不少女仔主動向Matthew施嗲功，甚至有另一短裙女興奮地主動坐其大髀上，雖然Matthew沒抗拒，但表現規矩，沒有手多多。玩至凌晨２時半，突然有警察到場查牌兼亮燈，Matthew初時表現愕然，其後自己坐埋一邊玩電話。
斷晒片乜都唔知
昨日Matthew接受本報電話訪問時稱：「前晚係有個好朋友生日，周圍啲人都好熱情。」他坦言飲了很多酒和香檳，問到被女生坐大髀一事，他竟反問記者：「吓？我真係冇乜印象，個女仔咩樣架？咁我有冇攬住佢呀？雖然我唔知（畀女仔坐大髀）但禮貌上我唔會推開佢。（怕唔怕翠翠嬲？）我哋係朋友，一直冇認拍拖，我去嘅係正常Party，朋友交往唔需要介意。」他又稱不知警察查牌，提到李晉強亦有同場，他竟想了好一會才稱曾在後段遇見對方，看來Matthew真係飲到斷片。
李晉強自爆分手
至於李晉強對於當晚Matthew畀女圍一事說：「啲女仔係圍佢，唔係圍我。」問到會否擔心激嬲女友朱晨麗？他竟說：「佢唔係我女朋友，我哋係朋友，依家好少聯絡，大家都好忙。」翠翠對緋聞男友Matthew在夜店畀女圍兼坐髀表現平靜，未有呷醋：「唔會唔開心，我哋只係傳緋聞啫，（佢畀女圍仲坐大髀？）佢不嬲都好受歡迎，其實後生仔去飲吓嘢冇乜問題，（佢去玩有冇向你備案？）咁又唔使，大家只係朋友啫。」
文、攝：追蹤組