莊思敏眼火爆：女星送上門
「富貴盛女」莊思敏在娛樂圈打滾近十年，雖然不用為生活抓撈，卻眼見不少同行為搶job、博上位，不惜出賣姊妹，貼身服侍老闆，坐大髀、送上門，無所不用其極。堅拒「旁門左道」的她，坦言努力付出換來零收穫的話，便會瀟灑離場！莊思敏今日起會一連五日與讀者分享她的盛女世界！
娛樂圈有好多關於飯局嘅傳聞，其實我都見唔少嘅！不過呢啲嘢有求先有供，試過有朋友叫我去食飯，點知去到先知係飯局，為咗唔好落朋友面，惟有勉為其難照食，點知個男人竟然塞疊錢畀我，暗示去下場。我嗰陣勁嬲，覺得好唔受尊重，一手撥開佢啲錢就走咗去。又有一次畀人呃咗去飯局，但竟然撞到識嘅Uncle，佢即刻面露尷尬神色，全程扮冇嘢咁食飯。
刻意穿走光短裙
飯局都可以自己決定去唔去，不過同行嘅「尾後針」真係防不勝防。好多人會為求達到目的不擇手段，即使對你好，背後都有其他目的。我試過有公關叫我出席活動，但後來冇咗下文，我覺得好奇怪，打聽吓先知原來係我個所謂「朋友」，同公關講我唔得閒，佢仲要自己收得低啲價嚟頂爛市，真係好火！
又有啲女仔知道我同某某高層熟，就特登同我混熟，仲問我攞佢電話、索佢料。我從朋友口中得知，佢真係好狼死，不停SMS該高層、約食飯，實行自己送上門。
其實喺呢個圈，有唔少女仔為咗博上位，明明唔係嗰間公司，甚至仲未加入娛樂圈，都會用好多時間陪住個老闆、高層或者導演去飲茶、行街，黐到實一實。有陣時去到K房、夜場或者慶功活動，佢哋都一定着得勁少，條裙短到坐唔到，郁一郁都會走光嗰種。
呢啲人成日攝位都不特止，有啲奀星仲會扮醉黐身黐勢，甚至仲坐埋上老細大髀添！我就見過有幾個真係取代咗啲默默耕耘嘅演員，成功爭取到演出機會，形容佢哋為「攔途截劫」就最適合不過。
零收穫自動離場
雖然睇唔過眼，不過我當然唔會去阻住佢哋啦，費事人哋覺得我「阻頭阻勢」，所謂「牛唔飲水唔撳得牛頭低」，呢啲係各師各法，但自己真係做唔出。我從來都唔抗拒社交活動，正常嘅食飯、飲酒我都OK，不過去到身體上嘅接觸就真係接受唔到。雖然依家喺電影方面，我仲未有代表作，我會繼續努力，若果付出好多，收穫都係零嘅話，我最多離場咋！
Profile
姓名：莊思敏（Jacquelin Chong）
出生日期：1980年5月1日
出生地點：馬來西亞
家庭成員：父母和兩位當模特兒的孖生妹妹莊思華、莊思明。
其他資料：於珠海書院工商管理學系畢業，2000年入行後擔任模特兒，並客串多齣電影，包括《喜愛夜蒲》、《猛男滾死隊》等，現時為無綫J2台節目《姊妹淘》擔任主持，其前男友為歌手吳浩康。
口述：莊思敏
筆錄：名人組
服裝：Tinseltown