吳雨霏心中有火 愈戰愈勇
在Cookies九餅女中，當年被指是醜小鴨的吳雨霏（Kary），經歷被柴台的挫折，反而在樂壇愈戰愈強，成績一枝獨秀，令重新起步的區文詩（Angela）羨慕不已。成為環球新寵的Kary，坦言跟公司目標相近，大家都有衝勁有團火，故將結婚計劃壓到30歲後，全力為事業衝刺。
A：Angela K：Kary
論事業︰互相欣賞
A：最近係咪好忙？我見你喺廣州走10個通告，你依家係咪轉戰內地？
K：都唔係嘅，我唔係Stephy（鄧麗欣），哈哈！都係做完香港宣傳至做內地，廣東省一帶聽廣東歌，點解唔去內地做多啲宣傳喎。
A（羨慕）：我覺得幾個姐妹入面，暫時Kary一馬當先，特別喺唱歌事業上，依家其實得番你，我啱啱起步唔計，我覺得你轉咗公司好好多，你點睇依家嘅工作？
K：可能新合作，大家目標相近，有團火有衝勁做嘢，以前我有好多顧慮、好多嘢要理、好執着，一定要攞到啲乜成績，但新公司好錫我，大家會幫我計劃，我可以好放心去唱歌，純粹享受就ok，依家唱片業愈嚟愈委縮，你愈強求反而愈辛苦，所以依家我有騷就做，有job就接。
A：我都想係咁，但我未去到好放心狀態，每樣嘢都要問，我又啱啱起步，同公司要磨合，樣樣嘢都跟得好緊，我依家就係你以前嘅狀態，樣樣都好執着。
K（真誠地）：我真係好戥你開心，我眼中嘅Angela係唔會輕易放棄嘅女仔，嗰次睇Cookies重組演唱會，你唱番自己solo歌，我坐喺下面聽住，真係想喊咁滯，因為feel到你一路冇放棄自己音樂事業，我喺你身上感到珍惜，依家好多歌手可以出碟，但出碟唔可以覺得奉旨，有人投資喺你身上係好幸運嘅事。
論緋聞︰厭倦回應
A：大家姐妹一齊成長，知道你都經歷過好多被人唔睇好，特別Cookies造型畀人評頭品足，係咪經歷過Cookies唔如意時候、畀人柴台，所以你都會好珍惜？
K：係架，我唔會出嚟講我好慘，我唔係嗰啲人，唔幸運嘅人比我更加多，唔會向嗰方面諗，自己都試過錯失機會。
A（慨嘆）：Stephy上次都話有啲後悔，Cookies其實可以做得更加好，我覺得喺我哋之中，你個底最乾淨最唔花，譬如我好多是是非非，或者其他姐妹都有好多緋聞。
K（自嘲）：唔係呀，我呢半年係等於過去10年緋聞囉。
A：呢啲咪樹大招風囉，人紅自然就會招到新聞，你點睇每次姐妹有新聞都叫我哋回應？
K：好煩，明明唔關我事，開頭回應覺得冇乜嘢，但後來乜鬼都要我講，覺得好煩，我哋真係乜都唔知，唔想講。
A（沒好氣地）：有次電視訪問，問我知唔知Stephy緋聞？我梗係知啦，但我唔會講囉。
K：係呀，好搞笑，成日問邊個同邊個拍拖，我心諗知都唔會話畀你聽，哈哈哈，好衰！（蠱惑地）突然諗起啲嘢，你之前啲緋聞，明明係真，但你又話唔係真，幾搞笑。
論婚姻︰時候未到
A：係咩，可能未認得切，哈哈！依家你事業都算去到一個高峰，當然仲有得去，但有冇諗結婚？
K：比起以前多咗啲，你熟悉嘅我知我唔會諗呢啲，我最記得初出道話23歲一定要結婚生仔，依家將呢件事壓到30後先諗。
A：但你一時一樣，因為你雙子座，今日諗嘅嘢同聽日唔同，我覺得你唔會似結婚，其實我哋仲係勁低能，Stephy就似係會結婚。
K（好奇地）：做乜你咁大膽認拍拖？
A：我又唔係行玉女型，唔需要隱瞞，我覺得做歌手可以唔認，但做電台冇得唔認，因為電台同聽眾好緊貼。
K：我覺得依家年代唔同，公開反而啲人覺得冇嘢好收埋，所以我覺得都係好事。
A：我希望你唔好咁早嫁啦，因為你喺我哋之中係最細，如果你都跑出我哋就好大壓力。
後記
訪問當日，一頭啡髮的Kary圍上大披肩，Angela見到即哈哈笑說：「好似Teresa（杜麗莎）呀。」Kary還以為是說傅穎（Theresa），嚇到碌大眼，場面爆笑，其實，Angela和Kary都好似樣，Angela自爆常被認錯是Kary，甚至有次在商場買咖啡，有情侶誤認她是Kary，將名牌銀包給她簽名，令她嬲爆。
採訪：音樂組
攝影：劉智源
場地：N.C. Grill Restaurant & Bar
髮型：Manho Li@Hip Hair Culture
化妝：Bi
服裝：Initial
髮型：Sue Cheung@Hair Corner
化妝：Shirley Lee