小齊畀雷劈 煎熬24小時

前日中午小齊原定由台灣來港，再轉飛南京演出昨晚的商演，可是短短幾小時的航程中卻經歷萬劫。小齊乘坐的航班來港中途，先遭雷電擊中，又受惡劣天氣影響，其航機要折返台灣加油再飛香港，終於到晚上7時許抵港。

微博呻滯留苦況

小齊在微博呻：「香港機場大延誤！到了轉下班（機）也不知何時！哎！無所謂了，能平安就好，剛剛在空中機身被雷電擊中，還好老天保佑。」以為可繼續行程，在候機室等到眼皮也垂下的他，於凌晨1時登機前留言：「還在機場！旅客們折騰的快昏過去了！希望大家畀點耐心！別心急發脾氣……」上載助手穿雨衣的無奈樣，可是到4時許，小齊竟仍在港：「下機了，但還是香港，等了半天取消了，最新登機時間？乘客中有些是老人家和小孩，很辛苦勞累……」最後，他於昨晨7時在狂風暴雨下成功登機。

對航空公司失望

昨午身在南京的小齊抵埗後在酒店小睡，由助手代綵排，他呻辛苦：「成晚冇瞓等上機，喺香港機場嗰12小時，航空公司只派了2張餐券。」可會向航空公司索償及感憤怒？他平淡說：「唔會，不過香港機場大混亂，成個機場都係旅客，我幾年前都試過喺大陸機場滯留好久，估唔到香港都會有呢一日，對航空公司係有失望，我攰到成個人散晒。」

問到經歷被雷電擊中的「九霄驚魂」，他說：「當時突聽到巨響，又好光，機身搖晃得好厲害，我未受驚，只係怯一怯，之後機長就廣播話飛機被雷電擊中咗，但一切正常，叫我哋唔使擔心。」

此外，今日在深圳開唱的台灣樂隊蘇打綠，前日下午由北京出發直飛深圳，同樣受天氣影響，先有航班取消，後又迫降廣州，折磨了十八小時終於抵達深圳，他們在社交網上鬧爆航空公司的安排。

文：音樂組