百變天后Lady GaGa前晚在韓國首爾蠶室奧林匹克競技場展開《The Born This Way Ball》世界巡迴演唱會，而GaGa開騷期間爆粗回應有關方面將演唱會列作18禁（即18歲以下人士不得入場觀看），實行向韓國政府宣戰！
韓國有關方面早前認為GaGa演唱會內容，會對青少年造成不良效果而將是次演唱會列作18禁，而連日來亦有宗教團體及組織在場外示威抗議GaGa開騷。不過GaGa就懶理外界批評，在演唱會舉行期間繼續我行我素大玩露骨場面，期間她亦忍唔住爆粗向當局宣戰。她說：「呢個場館不僅係競技場，亦係我哋嘅房間，係我哋重生嘅子宮。我聽講韓國政府禁止18歲以下未成年人士睇我嘅騷。好呀，我哋畀佢哋（政府）睇吓18歲以上嘅騷應該係點樣！你班癲咗嘅韓國人！」她亦叫全場四萬五千名「小怪物」（fans）舉手揮動18禁的手帶。
GaGa巡唱未舉行前已令眾粉絲期待，由於韓國騷與香港騷的內容差不多，所以率先為一眾GaGa迷預告香港騷內容。前晚演唱會比原定時間遲30分鐘展開，但她又唱又跳唱足20首歌，據知為了布置舞台，競技場早於十日前已全面封閉以便搭建中世紀的古堡。
前晚GaGa在以士兵打扮的舞蹈員護送下，騎着獨角獸出場，全場哄動，她繞場一周向韓迷打招呼並高歌《Highway Unicorn（Road to Love）》，而一向衣着大膽怪雞的GaGa在演唱會中亦冇令粉絲失望，除了露股，當唱《Government Hooker》時，她戴上外星人頭飾出現，唱大熱歌曲《Born this Way》時就換上金色晚禮服。不過一向出名衣着創新的GaGa亦有翻炒舊look，唱《Americano》時，她着回近似之前出席音樂頒獎禮時的肉衣出場表演，表演期間GaGa更被舞蹈員掟落大型碎肉機入面。
除了百變look，GaGa開騷又點少得爭議性的表演環節！在唱《Judas》時，舞蹈員用繩綁實GaGa身體。此外，亦出現GaGa與女舞蹈員在電單車上大玩同志纏綿。據知她唱到最後一曲《Marry the Night》時她更不慎在台上仆倒，最後搞到冇encore之餘亦沒有伴隨舞蹈員再次出場謝幕。
文：外娛組