黃秋生：開工嚴守三不

我係亞視演員訓練班出身，當年做演員嘅日子，要袋住部call機隨傳隨到，call機響代表你要立即仆返亞視化好妝、着好戲服standby，好多時一等唔知等到幾時，連續26個鐘都等過，久而久之聽到call機嗶嗶聲都心跳加速、反胃、神經緊張。

羅樂林鼓勵讀書

以前我等埋位，習慣攞書睇，好少同人吹水，好多人話：「讀書有用咩？」但羅樂林就鼓勵我讀書，佢講嘢靠譜，後來我得獎有多謝佢，好多人都唔知點解。

我記得當年有個好似叫「火記」嘅武師，見親我就問：「你本書呢？」佢講嘢真係高，試過好幾次都被佢一言驚醒。

巨星笑言有好嘢

記得有次出去拍電影外景，有位巨星笑咪咪咁叫我埋去，畀咗啖煙我吸，然後話：「有好嘢益你呀！」嗰時o靚仔唔識嘢，吸完即刻知衰，個頭暈陀陀，朦朧間聽到「火記」彈咗句：「你就巴閉啦！我知咩係樹，你連草都識埋！」

戲行有不成文規定，開工有三不：不酒、不賭、不隊草，我做演員，竟然咁樣破咗戒，當時我覺得自己好醜，結果成場戲草草做完，好在套戲係喜劇，叫做過到骨，但係成為我入行以嚟一件醜事，依家提番起我都覺得醜。（完）

後記：戲爛人不爛

秋生毫不諱言自己曾拍過不少爛片：「做人冇需要否定自己嘅過去，我係拍過唔少爛片，但我嘅演出一啲都唔爛！」喜歡說「人生如戲」的秋生，由亞視年代自覺演技不足，自發去讀演藝，到今天仍堅持手不釋卷，尋求進修，就算今時今日香港的生活環境如何愈來愈爛，秋生自強不息的做人態度從來不爛，這正是只識食定花生等睇戲者，從來不明白的正確做人態度。

口述：黃秋生

筆錄：影視組

攝影：司徒國榮