詩雅怕買假飛 無緣見GaGa
美國百變天后Lady GaGa將於下月來港開騷，身為「GaGa迷」的女星詩雅及吳雨霏（Kary）昨日分別出席有關偶像的活動，Kary坦言託上託才買到靚飛，而「撲空」的詩雅揚言不敢買「燶飛」，她說：「怕係假飛。」
國際巨星Lady GaGa的香港站演唱會早前掀撲飛潮，有不法分子為從中取利更出動排隊黨，令一眾「GaGa迷」捱貴飛，連本港藝人、歌手都難求一票。英皇藝人詩雅及樂隊Mr.昨日出席「TOUGH Jeansmith．Lady GaGa注目提案」記者會，詩雅表示撲飛失敗：「到目前為止都撲唔到。」由於不少人抄「燶飛」，問到為何不上網買？詩雅說：「唔敢買，怕係假飛。」同場有不少以Lady GaGa造型出現的參賽者，有位更是易服男，他以低胸連身短裙亮相，更抵死得彎身給記者影「事業線」，而部分人打扮極度騎呢，就連大會的保安亦大叫「想嘔」。
唔敢效法造型
而Kary昨日以GaGa造型出席海港城舉行的活動，她透露幾經辛苦才撲到兩張GaGa個唱門票：「係搭上搭先買到兩張，會同阿妹睇。（唔同林德信睇？）點解要同佢睇。」問到會否效法對方舞台上的激爆造型？她說：「太激就唔夠膽，尤其用膠紙遮重要部位。（三點式上台？）留喺海灘先着，咁多人望住唔係好慣。」
着內衣玩視訊
另外，將於今晚在南韓首爾開騷的Lady GaGa被爆開巡迴演唱會時會帶同男友Taylor Kinney喜歡的內衣，在Skype視訊穿給他看，認真激情！
文：音樂組