黃秋生讚周董：轉數快 EQ高
黃秋生做人有話直說，毫不保留，很容易被朋友疏遠變獨家村，但秋生的朋友及契仔契女質量兼備，當中契仔周杰倫就獲秋生讚賞，除與生俱來的吸引力外，腦轉數及EQ同樣超班。
做得我契仔、契女嘅都係古古怪怪，唔古怪都做唔到我契仔、契女，因為正正常常嗰啲，我冇興趣。周杰倫就係一個例子，佢有天生嘅吸引力，無論髮型、行為、唱歌、說話，佢又好有音樂才華，連帶佢做導演拍戲捕捉嘅畫面、用嘅配樂，都好有藝術感同創作力，好似佢上次話「周杰倫的全名不是你叫」，個腦轉得幾快，EQ又高，我黃秋生就諗唔到嘞！
我啲老友更加不得了，黃子華係名副其實哲學家，言之有物，做嘢有heart，佢做嘢好有理念，唔係着眼錢。近年佢做埋舞台劇，之前套《野豬》佢同林嘉欣都做得好好！劉青雲亦冇得頂，夠朋友！我好鍾意同青雲做朋友，佢同佢老婆（郭藹明）都好優雅，會關心同照顧朋友，兩公婆都散發住種貴氣，佢失落金像獎影帝只係因為佢有兩齣戲角逐，分薄咗票源。
張家輝被評似癲仔
至於張家輝，佢係個癲仔，同佢出街周不時被佢嚇親，佢乜都夠膽死，精力旺盛，娛樂性豐富，好鍾意混吉，佢做戲係「方法演技冇方法」，成個人入晒去個情緒度，返唔到出嚟，但佢覺得咁樣好過癮，其實咁樣好危險。
口述：黃秋生 筆錄：影視組