CoCo殺入無綫撼大孖馬賽

周秀娜師妹CoCo早前有傳其「巨聲幫」大孖男友周志文與馬賽撻着，這段三角戀鬧到滿城風雨，其後更有指她被大孖狠飛，心情直插谷底。雖然男方仍在上海為新劇趕工，但日前CoCo即現身無綫「踩場」！

當日約下午十二時，CoCo孖實拍檔韋彤於無綫內四圍逛，於化妝間、服裝間等地方自出自入，現場所見CoCo不時與韋彤並肩而行，期間有講有笑，而且表情多多，CoCo心情似未有受情傷影響，兩人其後於無綫差不多逗留近個多小時才於門外取車離開。

其後記者上前問CoCo是否特地前來踩場「示威」？她聞言起初表現愕然，其後澄清說︰「今次係嚟傾工作嘅嘢，而且今日我同韋彤有新歌派台，所以先嚟無綫。」提到早前她與周志文和馬賽的三角戀炒得熱烘烘，令各方關係變僵，問她有否影響與無綫關係？她則說︰「今次只係嚟傾工作，其他事冇講。」

此外，據知CoCo正與無綫洽談歌手和藝員約，與周志文和馬賽正面交鋒，問她是否真有其事？她不忘向無綫賣口乖，言語間未有否認，她說︰「以前我喺澳洲成日睇TVB，當然想日日上獎門人同拍劇啦！」她更坦言若碰見兩人不覺尷尬︰「我從來冇尷尬過，佢哋仲尷尬過我啦，依家心情就好似呢排天氣咁，時好時壞。」

文︰專案組

CoCo殺入無綫 撼大孖馬賽