黃秋生：只同蠢人做朋友

周星馳絕對係一代宗師、係天才，佢嘅演戲方法依家可能過咗個熱潮，但當年絕對係創先河。我敢講，我係第一個研究佢無厘頭現象嘅人，雖然有啲前輩話佢當年喺《他來自江湖》入面唔知做乜，但佢照樣大紅，觀眾就係鍾意咁，因為真係好笑。

周星馳成功在處身喺一個反智年代，去表達對權威的不尊重同無禮，喺佢出現之前，社會有太多嘅道德規限，你睇佢喺《430穿梭機》度玩細路已經睇到迹象，佢替嗰個年代爭取釋放，佢嗰種冷嘲熱諷、講說話嘅咿咿哦哦，冇人可以模仿。

周星馳曾經講過，佢話佢叻過羅拔迪尼路！點解呀？因為羅拔迪尼路若果嚟香港拍戲，對住香港嘅制度，一定嗌救命！只有香港演員至搞得掂，仲要有票房。原來我同你鬥衰就係叻過你？咁邊有人夠你勁？呢個就係周星馳特有嘅思維，佢唔係技術上嘅詭辯，而係思考模式好迷糊，佢咁講係咪真係啱呢？呢個係矛盾題，既是亦非。

專心己務值得欣賞

但有樣嘢唔能夠唔讚佢，就係從來只有人話佢，但就未見過佢去話人，以前聽佢講過：「自己做自己嘢啦，點解人哋成功，你又唔明！」佢嘅品格算係相當唔錯。

不過，我同周星馳唔算好熟，合作亦係點到即止，佢講過唔同蠢人做朋友，但我就只同蠢人做朋友，咁我點會同佢做到朋友？

口述：黃秋生 筆錄：影視組