鄭嘉穎脊椎移位 CHOK唔起

鄭嘉穎昨日以賽事大使身份出席「賽馬冠軍一哩賽」活動，向來喜歡寶馬車系的他更坐着開篷跑車出場，期間他打趣謂：「會唔會送部M5畀我呢？」不過最終他只獲大會送贈汽車模型，又拿着巨型鎖匙來拍照，事後問到會否感失望時，他笑言：「好失望，以為會送部車畀我，依家部車好細部，條鎖匙就好大，其實馬會同寶馬同我都幾有緣，我本身都係馬會會員，佢哋不停問我會唔會養馬，依家唔係時候，我對馬會會所興趣大啲，我鍾意健身、打波。」

傷舊患睇跌打

問平時是否香車伴美人時，他笑言：「望就係咁望啦，不過一步一步啦，依家冇乜時間做私人嘢，今年已拍咗兩部劇，過兩日就返大陸拍第三部，明年睇吓有冇多啲時間去經營其他嘢，人生係要兼顧好多嘢。」說到搵完「人仔」搵女仔，他指男人應以事業為重。

日前，他去看跌打，原來是上年在大陸拍劇時發生車禍，頸部及背脊都移位，不過為免母親擔心，沒有說出來。他謂：「其實呢啲傷係要做物理治療，不過冇時間，之前喺上海拍一個二樓跳落嚟嘅鏡頭時，又郁一郁，嗰日咪去啪番正囉！依家啲脊椎移一移位都好唔舒服，所以我唔chok得o架！」

文：影視組