不忿被屈「兇」記者 黃貫中爆粗︰冇掟玻璃
有樂壇狂人之稱的黃貫中（阿Paul），就前日某免費報紙指他年前曾掟玻璃落街「兇」狗仔隊，自命敢做敢認的他，不滿被砌「生豬肉」，以連串粗口發洩情緒外，更發毒誓說：「我失聰，唔係失憶，我真係冇做過，唔怕喺過世阿爺墳前發誓：『我有做過，落街就畀車車×死，話我樣衰，話我窮、話我女友都可以忍，呢鑊真係忍唔×到。」
冇批評周董
阿Paul指傳媒要有職業操守，因事態嚴重，有損名聲，故要求「作者」還其清白：「叫佢攞證據出嚟，掟玻璃落街係犯法，點解佢唔報警拉我呀？」而問他可曾批評和台灣傳媒起衝突的周杰倫行動不當？他大聲說：「梗係冇啦，做乜拉佢落水，係咪要做『搞屎棍』，搞到兩批歌迷起罵戰呀？」Paul自認「聲大」，但對傳媒冇惡意，又謂君子動口不動手，他說：「我發誓冇郁過狗仔隊一條毛，我歡迎畀我郁過嘅狗仔隊行出嚟指證我。」
賣樓打官司
Paul昨日已託經理人會見律師採取法律行動，有謂官司錢可能龐大又費時，他寸爆說：「咁我賣×咗層樓去打官司囉。」至於有何賠償要求？他謂：「要佢登報道歉，寫明『老屈』我，不過道歉都照告，點呀！」
文：音樂組