馬浚偉：暫別無線係好事

我跟無綫關係一路都好好，有信心講這十八、九年來，我都冇乜怨氣、冇乜投訴，有嘢就做，喺能力範圍內我一定交最好的畀公司，但始終人夾人緣，我跟經理人部門的合作，的確係磨合得不好，可能我多年來習慣咗唔出聲，冇表達清楚想要啲咩，某程度上我要負責，但因為咁，我累積咗六、七年的唔開心。

念舊亦要諗自己

換另一角度睇，經理人部門又有冇問題呢？這個我不方便講了，既然我揀要離開公司，意見分歧的確係存在，那就不如開心、快樂、和平地終止合約。何解冇轉圜餘地？好難逐一去講，亦冇必要講，但我可以話即使有無接拍《建元風雲》都好，我都會提出解約，因呢幾年累積咗很多事，令我對無綫心淡，否則呢個如此安全、平穩的電視台我又點會放棄？正因為我對無綫太有感情，坦白講……我好鍾意無綫，我夠膽形容自己是念舊一類，但我最後都是尊重自己的感受，今次暫別（無綫）可能是好事。

與樂小姐緣分薄

要我形容跟樂小姐（樂易玲）關係，講真，我同佢接觸唔多，台慶亮燈當晚個個都拉我哋合照，當時因為不滿的新聞，情況可能有點敏感，但我冇所謂，只因當時記者走來要求影相，又叫樂小姐跟我合照，而樂小姐又與其他女藝人合照中，公關又走來接走我去影海報，而珍姐（曾勵珍）又以為我趕入廠叫我走，人人衝埋來扯住我，一下子我講了一句：『點解忽然之間我咁忙？」結果是未能跟樂小姐合照，那一刻我冇諗其他人是否想替我解圍，但大家行得正企得正，根本不需要尷尬！

過去咗就算了，做人要過人過得自己，我不想有任何言詞令樂小姐難做，亦冇必要，既然大家緣分薄就隨緣啦！更何況我暫時唔會喺工作上與樂小姐有接觸，就算再傾約我都唔擔心，如果公司錫我的話，佢哋應該明白的。