張致恒公開求婚 鍾舒漫：勁無聊！
張致恒（Steven）翻撻鍾舒漫（Sherman）的傳言春風吹又生，昨日有讀者爆料指他在圖片分享網instagram向Shermen公開求婚，浪漫到暈！惟本報向女方求證時，她卻冷淡說：「勁無聊！」甚至踢爆Steven冇實際追求行動！
BOYZ成員Steven自多年前跟前歌手傅珮嘉情變後，就與同門師妹Sherman傳緋聞，08年兩人被拍得在公屋共賦同居，惟當年Steven貪玩兼無心工作，加上被揭背女友上網溝女，結果分手收場。近年修心養性的Steven除的起心肝工作外，還向Sherman展開翻撻行動，投其所好加入教徒行列。
好想拍拖結婚
Steven目前身在歐洲，與教友梁雨恩、楊芷瑩做音樂佈道會，有讀者爆料指他前晚在instagram向Sherman求婚，更自拍瞓覺相放上網，他留言：「我訓（瞓）醒啦，妳做緊咩啊？我好掛住妳，妳有沒有掛住我啊？（其實我沒有女朋友，幾時先可以拍拖呢？我可能一拍就結婚！）」粉絲即留言估他向Sherman示愛。
本報向Steven求證，他透過短訊回覆：「無啊……因為巴黎係一個好浪漫嘅地方，所以瞓醒有感而發，我好想拍拖好想結婚，但係依家仲未有女朋友，等耶穌安排啦，佢一定會畀我一個最好嘅。」問會否追番Sherman？他扮傻說：「佢跑咗去邊？哈哈哈哈，我要努力工作，因為努力工作嘅男人係最吸引。」
情人節冇表示
Sherman接受電話訪問時說：「勁無聊！唔知佢寫畀邊個，冇人同我求婚。」問對方是否再追她？Sherman謂：「唔覺，情人節冇表示，依家我哋係正常朋友互相關心。」會否重新給予機會Steven？她坦言：「唔知o架，佢追先算。」看來Steven要加把勁，才能抱得美人歸了。
文：音樂組