曾國祥撐William 未來影帝

曾： 曾國祥　

陳： 陳偉霆

曾國祥（右）覺得陳偉霆啱做蠱惑仔角色。

陳偉霆望一嘗提名影帝的滋味。

志偉個仔更要努力

陳：我哋認識係因為拍你導演嘅電影，當時你搵我試鏡，我未做過戀母角色，挑戰性好大，以前只係客串性質，呢部係真正做戲嘅第一部電影，好surprise你會用我。

曾：嗰時我對你唔認識，有朋友提議我搵你，好老實我第一個反應：佢得唔得架？後來約你傾偈，感覺非常好，你好認真，最驚啲新人嚟到一舊飯咁，但我同你講個古仔，你已經消化緊，試戲時表現非常之好，好快就決定用你。

陳：呢個圈好難一炮而紅，我覺得要默默耕耘，雖然好多人誤解我、攻擊我，不過我已經慣咗冇hard feeling，只要努力，大家會畀機會。我喺你身上睇到相似共通點，大家都有團火燃燒緊，你咁快做到導演，呢個就係努力達到目標，我覺得你有一個好勁嘅daddy，所以你要比人出更多力，去證明畀人睇你係得，否則啲人會話：梗係啦，你係邊個嘅仔！

曾：我好贊成你嘅講法，初入行無論自己做乜，啲人都話我係曾志偉個仔，自己開頭會介意，不過只要用十倍努力，慢慢去做可以改變人哋睇法。我都聽到好多人對你誤解，話你chok、扮型，我都試過不下多次幫你講好話。

陳（戰戰兢兢）：想問吓拍完呢部戲，你啲朋友對我有冇改觀？

曾（微笑）：有好多改觀，大家覺得你原來識做戲，幾好喎，我同朋友講，你個人好好，我好鍾意你嘅態度，你做嘢好認真，記得拍第一日，你啱啱喺廣州返嚟捱咗48小時，我知你冇瞓覺爆晒瘡，但你完全冇呻過，有啲演員拍完即刻匿上車休息，你就喺身邊睇我哋拍，嘗試投入我哋嘅製作，好畀心機做好呢件事。

陳：因為我覺得自己未識做戲，需要學習，所以我唔敢瞓覺，一瞓我會昏迷，就算醒咗都驚投入唔番場戲。

趁年輕乜都試

曾：你從影時間唔長，但演出好多角色，有一個角色我覺得你好適合，就係做蠱惑仔，你個look好啱。

陳（自嘲）：我個樣夠衰、夠寸，就由得人哋誤解，呢個世界係咁，我冇諗過拍戲要丟低歌手包袱，可能做歌手未太成功。

曾：呢樣我幾欣賞你，開頭都擔心你喺電影角色有啲負面，你公司話唔緊要，乜都畀你做，我覺得幾好，做演員唔應該介意角色同歌手有衝突。

陳：我喺你身上學到好多嘢，當時自己唔係咁明點做戲，你每拍一場戲都做畀我睇，你真係演得好好，大家都係想拍好部戲，盲舂舂係咁衝，我哋都係年輕人，有乜就去試。

曾：老竇都係咁教，由我入行就同我講，呢行有機會就去做，唔好計較得着、利益，做咗先，因為你嘅努力大家睇到。

陳：最近我至明白呢個道理，之前自己喺無綫做主持，又影fashion、拍電影、唱歌，跳舞，令到我好難集中走一條路線，我諗係咪應該放棄一啲嘢呢？我問咗好多前輩，佢哋叫我唔好介意，依家咁嘅市道有得做咪好，怕咩辛苦，我呢個年齡唔使瞓，諗諗吓自己仲年輕撐得住，咪乜都做。

一導一演各有所求

兩人各自在影壇拚搏，打滾多年的Derek望長做長有，初生之犢的William卻想獲提名。

曾：一年執導一部戲已開心，冇set目標畀自己做到乜地位攞乜獎，長做長有已經係一種幸福。

陳：我掉番轉，好想追求提名感覺，唔係要獎，我想進入呢個圈子，覺得電影頒獎禮係盛事，好想見識吓，咁大個仔未試過去金像獎現場坐，好想睇梁朝偉。

曾：哈哈，其實金像獎好悶架！你睇劉青雲都要前幾年先攞到「最佳男主角」，某程度上真係排隊，我覺得你態度同演技都有，就係欠一個好劇本同有心幫你嘅導演，做演員要天時地利人和，啲人話呢行偏門，就係有呢啲運數，成日講香港冇演員、冇明星，我覺得你絕對有潛質有能力上位，香港要栽培多啲新嘅男一號。

陳：哈哈！咁我都回敬番你，希望你攞「最佳導演」囉，好多謝你讚賞，但我冇飄飄然感覺，攞獎係人都想，不過自己冇信心，真係唔敢諗，有戲拍已經好好，就算演殺人犯、強姦犯，我都覺得係一個紓壓，好享受呢個過程，男仔呢行壽命長啲，唔趁年輕累積，到老只會得番個殼，自己讀書又唔係多，惟有靠工作增值。

採訪：音樂組

攝影：司徒國榮

化妝：Khaki Yan

髮型：Chin.G

服裝：Meeh

場地：Sakesan