陳煒：冇評論功能少咗樂趣
微博之威力強大，令兩岸三地明星藝人均紛紛開通微博戶口加入，可即時得悉外間及粉絲的評論及回響，宣傳效力強大，現時暫時停止評論功能，各人反應迥異。
甄子丹早前與趙文卓鬧不和而捲入微博風波，其發言人張小姐昨回應說：「子丹嘅微博日日畀人瘋狂攻擊，佢都冇評論，係唔想連累朋友再被殃及。微博係畀大家同朋友、粉絲交流嘅地方，係個好方便嘅平台，大家都有言論自由，可以發表唔同意見，但大前提應該理智、和平，唔應該造謠生事、謾罵中傷。發生不愉快事件後，子丹早於3月22日已在微博呼籲粉絲保持沉默，佢嘅粉絲大部分都克制自律，令佢好欣慰。」
陳煒：「我都知要突然之間停幾日，都有少少唔慣，惟有用轉載功能寫自己嘅感受，過往我發嘅微博都好多評論，但評論功能停咗，今日即刻靜咗好多，平時有二、卅個評論，依家剩番十個八個轉載，少咗啲樂趣。」
伍詠薇：「都係fans話我知，其實我唔多識玩微博，過往都只係回應、搭嘴。今次暫停評論功能，我就覺得冇乜嘢，可能係內部要做啲嘢啩？暫停對我冇影響，我可以轉私信同朋友溝通，仲有WhatsApp呢！」
賈曉晨：「我的微博出問題了，我看不到大家的留言！要到4月3日才恢復正常，那麼我先自言自語吧！」
張衞健：「雖然之前畀人入侵過微博，但自己耐唔耐都有玩，唔會斬腳趾避沙蟲，就算暫停評論我都冇大影響，自己好少評論人，只係睇fans嘅評論，只係封幾日冇大礙吖，以前冇微博都係咁過日子。」