劉心悠攬Chilam痛哭

早前跟視帝鄭嘉穎傳緋聞的劉心悠,日前深夜與張智霖(Chilam)於九龍塘為電影開工,二人在街頭吵吵鬧鬧,淚流滿面的心悠攬着Chilam痛哭!

劉心悠和Chilam日前深夜繼續為電影《天生愛情狂》於九龍塘街頭開工,當晚拍攝二人嗌交後,心悠投進Chilam懷抱痛哭的戲,亦是心悠的煞科戲,故電影公司老闆蕭定一特地帶香檳前來探班兼慶祝,心悠對煞科感到非常開心及不捨,並感謝劇組的照顧。

轉軚睇緣分

當晚心悠因為要拍攝喊戲,故未埋位時她則獨坐一角培養情緒,原本愁眉苦臉的她提到緋聞男友鄭嘉穎時即甜笑,但她起初強調兩人發展機會等於零︰「冇呀,娛樂新聞就係畀大家笑吓,依家唔會有發展機會,我唔想畀人覺得大家有機會,呢啲睇緣分。」其後她又轉口風,坦言將來的事沒有人可預知,她說︰「要睇緣分,感情係要有感覺,圈外圈內人都冇所謂。」問到傳緋聞後會否怕嚇退追求者,心悠則說︰「冇乜好驚,感情事都係順其自然。」

獲粉絲餵飽

至於Chilam則表示自己還有一日才完成拍攝,希望其後有機會與全個劇組和演員飯聚,而導演葉念琛則表示會繼續每年拍攝不同題材的愛情片,並透露現正洽談幾部電影。另外,Chilam近日拍畢《天》片後,抽空與影迷於白石搞BBQ聚會,期間巧遇在該處打波的曾志偉和苗僑偉,今次的聚會吸引來自泰國、北京及上海的粉絲前來,並為偶像準備零食,難怪Chilam笑謂︰「佢哋梗係知我為食啦。」

文︰專案組