Kelly生o左o剌
恭喜恭喜！39歲天后陳慧琳（Kelly）昨午剖腹誕下6磅半細仔，「小龍包」出籠喇！母子平安。老公劉建浩（Alex）陪入產房拍DV及親手剪臍帶，兩夫婦攬着小龍包又抱又錫，再為人母的Kelly開心公告細佬似哥哥劉昇，同樣擁有蝦餃下巴。
Kelly去年3月經歷小產傷痛，失去懷胎5月的孖女後，勇敢的她跟老公Alex互相扶持走出陰霾，調理好身體後再度接受人工受孕，終幸運地懷有第二胎。今次Kelly放鬆心情迎接小龍包出世，早已停工在家待產，懷胎9月的她，於周一（19日）還佗着籮咁大個肚親自湊「蝦餃仔」放學，想不到昨日即靜悄悄入院生仔。
與哥哥同有蝦餃下巴
據知，Kelly昨早在老公Alex陪伴下，由司機駕車秘密入住嘉諾撒醫院的VIP產房，於下午由婦科聖手何永超醫生為她剖腹產子，花費約12萬6千元。小龍包重6磅半，比哥哥出世時還重半磅。傍晚時分，Kelly在其官方網頁宣布喜訊：「小『龍』包今日（昨日）出世喇！細佬重6磅半，母子平安，遲D一齊同大家見面啦！」粉絲紛紛留言祝賀。
本報致電Kelly恭賀，她透過經理人公司發言人譚先生回覆：「Kelly啱啱開完刀，依家仲有啲攰，不過精神幾好，佢同Alex都好開心。Alex有入產房剪臍帶拍DV，影咗好多相，Kelly話依家未睇到BB似爸爸或媽媽，不過佢同哥哥一樣有蝦餃下巴，好可愛。」由於蝦餃仔只有2歲多，故昨日沒去醫院探望剛出生的弟弟，Alex這幾天暫定會在醫院過夜陪伴照顧Kelly和小兒子。
「要諗一個好型嘅名」
問到Kelly心情如何？譚生說：「佢好開心，唔算好緊張，因為已經第二胎。」一直恨生女的Kelly已有兩子，問會否再追女？譚生說：「Kelly話小龍包啱啱先出世，暫時唔諗住，BB亦未改名，因為要跟哥哥用單字，要諗一個好型嘅名。」
據知，小龍包是摘好吉日剖腹生產，配合父母和哥哥的時辰八字，由於蝦餃仔太細個，不太明白「弟弟」是甚麼，故沒有呷醋。另外，Kelly將家裏的衣帽間改裝成BB房，讓蝦餃仔和小龍包兩兄弟各睡一房，以免小龍包喊叫時影響哥哥睡眠。雖然Kelly入院生仔不能親自照顧蝦餃仔，不過蝦餃仔非常聽話，沒有扭計，Kelly希望盡快出院一家四口團聚。
文：音樂組