陳寶珠：師傅要我領悟

我真係要好感激上天，畀我遇到我師傅任劍輝、白雪仙同媽咪（養母宮粉紅）。我好細個就被媽咪領養，先後跟父母及粉菊花師傅學戲，10歲同梁醒波女兒梁寶珠合組「孖寶劇團」，當時波叔邀請咗任姐同仙姐嚟睇，我同師傅就係咁樣結緣，14歲時獲任、白兩位師傅收為徒弟。

唔理觀眾席

其實我每次演出，仙姐都會嚟睇，初初我會刻意叫工作人員唔好話我知仙姐嚟咗，因為仙姐在場會好大壓力。仙姐係個好含蓄嘅人，佢以往睇完戲只會話「幾好」，佢要你自己領悟。我諗我喺師傅眼中未算合格，但你做得師傅嘅徒弟，就唔需要下下要師傅提點。到咗依家，我出台唔會理台下有咩大人物，我踏出虎度門一刻，就完全忘記自己，融入角色裏面。

年輕時硬頸

除咗師傅，每次睇我演出的還有媽咪，雖然佢已經走咗，但我已經預咗即將上演的粵劇《紅樓夢》頭場同尾場的空櫈畀佢，我知道佢會嚟睇。依家我每晚臨瞓都會同佢傾偈，其實我對媽咪係又敬又愛又怕，我後生時太顧住拍戲，人又硬頸，直到結咗婚，唔捱得夜嘅媽咪，捱更抵夜幫我照顧囝囝天經，同我多咗傾心事，至知道媽咪一直好錫我，我哋嘅關係，喺我息影之後更加密切。我成日夢見媽咪，亦好難講有無機會見番佢，無論如何我都希望佢自由自在，或者投胎去一戶好人家，開開心心生活。