Kelly挺肚接送 蝦餃仔興奮玩反眼
陳慧琳（Kelly）的寶貝仔劉昇（蝦餃仔）告病假6日後終復課，昨日Kelly親自接送，蝦餃仔更聽從媽咪吩咐展示流口水及反眼的精靈樣。至於曾考慮請保鏢護愛女康堤的徐濠縈，現有感女兒夠醒目，故暫將計劃擱置。
Kelly的乖仔蝦餃仔早前因患感冒而缺課，昨日蝦餃仔病愈重返校園，繼續由大肚Kelly、經理人鍾珍及外籍女傭組成的「娘子軍」接放學。昨午12時，腳踏半吋高紅色boot的Kelly抵達幼稚園。問Kelly蝦餃仔的病情？她初時問非所答說：「返學囉，（係咪病好呢？）七七八八啦。（佢返學仲有冇喊呀？）冇啦。」再問她是否已訂定床位，擇定吉時開刀生仔？她說是。至於是否本周入院？她則未有正面回答，只謂：「要講之前都講晒啦。」隨後轉身入學校。
笑到流大滴口水
數分鐘後，蝦餃仔由菲傭抱住步出，Kelly即叫乖仔向記者揮手say hi，但鬼馬的他卻遮面，由於鎂光燈閃到蝦餃仔反眼，Kelly安撫愛兒說：「呢度黑呀，所以哥哥要用閃光燈。」還搞笑地跟傳媒說：「你哋叫佢劉昇啦，佢識望鏡（頭）o架。」在臨離開前，乖巧的蝦餃仔繼續努力交足戲，反白眼、手指指、笑到見牙唔見眼等表情都做晒，未知是否笑到嘴仔痹關係，見蝦餃仔口角流出一大滴口水，相當趣致。
徐濠縈唔請保鏢
另外，徐濠縈前晚到深圳出席活動，坦言未試過星期日要工作，她說：「今次係好高人工，唔係點請得我郁呀？（咪陪唔到囡囡？）安排咗節目畀佢啦，佢今日會去山頂觀光。」最近拐子佬新聞鬧得熱烘烘，問到老公陳奕迅是否真的要請保鏢保護愛女？她就表示暫時沒有需要，因為囡囡不會跟工人單獨外出，她又認為愛女性格很敏感，故懂得保護自己。
文：音樂組 攝：追蹤組