糖妹開心：搵到好歸宿
組合糖兄妹的糖妹（黃山怡）早前被本報拍到拖組合Bro5成員Dominic返家短聚，斷正後的糖妹大方承認戀情，昨日兩人分別出席活動，戀情曝光首次見人的Dominic透露被女友打動才開始發展，更不忘大讚女友是甜姐兒。
曾是「宅男女神」的糖妹初出道即被踢爆已為人妻，不過她堅決否認，更多次自爆對一位圈中大隻男「起痰」，經過本報連日追訪，終被拍到糖妹與組合Bro5成員Dominic撻着，糖妹更與男友十指緊扣返歸短聚三粒鐘，報道出街後糖妹直認與對方發展中。
已見家長
糖妹昨日與男友Dominic分別出席活動，Dominic慘遭司儀將戀情擺上枱，不過他不怒反笑指近日糖分比較高，他說：「唔想成日講感情，因為會阻礙工作，加上對佢好唔公平，佢起步得好好，我哋先啱啱起步。」問到是否已見雙方家長？Dominic說：「見過晒。（佢話暗戀你3年？）大家識咗3年，我比較慢熱，真係畀佢打動到，佢真係幾甜。（佢追你？）自然走埋一齊，佢真係幾甜。」
等做花女
對於糖妹被傳已嫁人，Dominic說：「報道假嘅，佢乜都同我傾，但冇提過呢樣嘢。」另外，糖妹透露將以花女身份出席糖兄婚禮，問到會否叫男友做花仔？她說：「睇佢有冇時間，有就可以推介做花仔，可以搬搬抬抬。」隨即冧笑說：「自己搵到好歸宿好開心。」而糖兄坦言有見過Dominic，他說：「當時佢仲未同糖妹拍拖，佢幾靚仔同埋為人好好。」
文：音樂組