李泳豪 Miki 兩月情見光死

李泳豪放下與楊思琦的一段情，被指與中、韓混血兒Miki拍拖。可惜有消息指女方身份複雜，既已有丈夫兼曾與洪天明拍拖。昨日，李泳豪與父親李家鼎現身九龍城「醫肚」，對於與Miki之間關係，他澄清大家只是剛剛認識約兩個月，不知對方有丈夫，他說：「之前都答話大家未正式開始。如果人哋真係有老公，我梗係唔會做第三者啦。同埋當日出咗新聞後，大家根本已沒有聯絡，已見光死。事件去到呢度太煩，亦唔想再講感情事，直頭唔想喺香港拍拖。我依家係單身，只想寄情工作同賽車。」

失眠一星期

另李泳豪承認已將楊思琦的物件轉交朋友，待楊思琦回港再作轉交。問到日後二人工作碰面會否尷尬？他說：「分咗手都係朋友，但復合、返轉頭係無可能，但朋友上幫忙都會。」他承認事件已令身邊朋友受影響，自己亦失眠一個星期，希望事情快點完結。

李泳豪與父親李家鼎現身九龍城醫肚，樣子愁爆的他似向父親吐苦水。

李家鼎（右）表示未曾見過Miki。

阿爸未見過

而身為父親的李家鼎指未曾見過Miki，他說：「個仔都話係啱啱識。（唔抵？）呢啲好難講，順其自然啦，都係一個朋友啫，認識唔係一定講到要追。」快將與洪天明拉埋天窗的周家蔚表示：「天明解釋咗件事，話都唔記得咗，係與唔係都唔會嬲，咁耐之前嘅事，聽講對方都結咗婚啦。」

文：影視組