Twins落手落腳開舖捱通頂
Twins的二手衫店舖昨日開張，一向善心爆棚的二人表示今次是作慈善義賣，會把收益扣除成本捐予食物銀行。Twins更落手落腳去參與執衫及標價等工作，為了慈善可謂不遺餘力。
Twins的二手衫店舖昨日開張，內裏放滿她們的高踭鞋、衣服及手袋等，現場更有不少客人入內選購。二人表示今次出售二手衫乃作慈善義賣：「今次我哋執咗成萬件衫出嚟做義賣，收益扣除租金、人工後，會捐畀食物銀行，睇吓到時賣到幾多，但至少都會捐20萬，多過20萬就會捐晒去。」
而二手店暫定開兩星期，並會不停加添新衫。問到為何選擇捐錢予食物銀行？蔡卓妍（Sa）表示之前曾與食物銀行合作，知道該機構會派食物券予有需要人士，可幫助貧窮家庭；而鍾欣桐（阿嬌）則謂因有很多人都需要食物。
提到二手店逾千呎，Twins表示商場以相宜價錢租給她們，而母親及朋友們都會輪流幫手，只收便宜的人工。Twins為了挑選衣服作義賣，亦花了數天時間，阿Sa謂：「真係執衫執到好攰，淨係執啲T恤已經執咗兩、三日。」而阿嬌更特別到貨倉收拾衣服。
全新鞋一折售
二人除了執衫、租舖出心出力外，連標價都是由她們一手一腳去做，她們表示試過標價標至天光。而不少貨品更是新簇簇，阿嬌謂：「好多鞋都未拆牌，買返嚟成5千蚊，但依家就一折賣出去。」兩女表示收拾衣服的同時，亦令她們有所領會：「執完衫之後，覺得唔好買咁多嘢，學識有需要先去買，但依家已經比以前好。」並言收拾衣服的時候，就如經歷時裝的演變，感覺得意。
文：音樂組