蝦餃仔缺課4日 陳慧琳禁室保護
拐子佬驚現香港學校外狩獵小童，全港星級爸媽高度戒備，昨日郭晉安和老婆歐倩怡親自接兒子令山放學；至於臨盆在即的天后陳慧琳（Kelly），平日大住肚都不辭勞苦湊蝦餃仔返學，然而，自上周五開始，兩母子卻離奇絕迹學校，令家長們議論紛紛……
潮媽Kelly育有寶貝仔劉昇（蝦餃仔），再次懷孕的她已全面停工待產，雖然下月就是預產期，但佗住籮咁大個肚的Kelly依然每日風雨不改湊仔返學，惟昨日卻不見Kelly現身兒子學校，據同校家長透露，自上周五開始，已不見蝦餃仔返學，有八卦家長估Kelly已悄悄誕下第二胎「小龍包」。
屋企都要戴口罩
本報致電Kelly經理人公司查詢，發言人譚生回覆：「Kelly話蝦餃仔流鼻水，唔想佢傳染畀小朋友，加上依家係流感高峰期，所以冇返學啫，其實早排蝦餃仔都感冒，好番又畀同學傳染，所以Kelly畀囝囝喺屋企休息多幾日，聽日都唔會返學。」對於拐子佬肆虐香港，問會否擔心唔畀囝囝返學？譚先生謂Kelly對這件事冇回應。
問Kelly是否已秘密入院生仔？譚生說：「未生得，Kelly依家專心喺屋企照顧蝦餃仔，佢自己都好小心，因為蝦餃仔唔肯戴口罩，所以Kelly就自己戴口罩，冇畀囝囝傳染，佢依家心情好平和，好期待『小龍包』出世，有好消息會公布。」昨日本報在Kelly寓所守候，亦只見司機駕車出入，全日都不見Kelly母子蹤影。
盼警方徹查清楚
至於無綫小生郭晉安和老婆歐倩怡，昨午行孖咇接囝囝令山放學，對於香港驚現拐子佬，安仔坦言好擔心兒子安全：「呢排要睇實啲，盡量提高警覺，因為囝囝仲細，唔好話拐帶，夾硬捉走佢都有可能。」對於陳奕迅想請保鏢保護囡囡康堤，安仔說：「我得閒啲，可以做埋保鏢，哈哈！」
身為人父的安仔為免嚇親兒子弱小心靈，不敢跟囝囝談及拐子佬傳聞，他希望警方盡快查清楚拐子佬事件，現在傳聞太多，有真有假，他亦有好多疑問：「如果話啲拐子佬係內地人，點解佢哋要咁麻煩嚟香港拐帶呢？又要花心思運返上內地。」
文：音樂組