JC：分手就要決絕
Jessica C.（JC）樣靚身材正，理應不乏裙下之臣，但世事卻剛相反，為工作兩頭忙的她因與Sergio聚少離多，加上性格不合結束幾年的感情，但她自言「食得鹹魚抵得渴」，未有後悔，反而繼續追求屬於自己的愛情。
我拍過三四次拖，每段關係都好認真對待，我唔覺得自己的感情路好崎嶇，之前跟Sergio分手因為性格不合，當兩個人的目標同價值觀愈懸殊，或者女方比男方紅，就會有壓力，關係好難維繫，當時大家產生好多摩擦，呢個係其中一個分手原因，大家冇咗信任，再因為長時間分開，覺得大家追求嘅嘢唔同，以前我只係做model，但依家變成藝人，所以認為大家係不同世界。
可能呢個就係分手導火線，但同第三者冇關。分手之後，大家冇聯絡，因為唔方便來往，唔想產生太多枝節，Sergio分手初期偶爾想搵我，但我唔會，因為要分手就要決絕啲，而我分咗手兩三個月心情已經好番好多。
容易畀人呃
對愛情我係執着，而且很認真，如果有固定伴侶，我就會好投入同固執，甚至會放棄一啲嘢，我唔介意畀人話我供養男友，因為我知道唔係，其實大家只係有錢就一齊使，一齊食飯可能只係我畀多啲，而唔係供養畀家用。我係一個鍾意付出嘅人，同一般香港女仔唔同，好多人會覺得點解我會咁蝕底，但我唔係咁計較。
任何人我都相信，其實我都幾單純，好少一開始就假設對方係壞人，我會盡量配合人哋嘅要求，所以都容易畀人呃。即使以前感情上遇挫折，但我仍然相信愛情，唔會因為咁樣而唔再追求同物色男友，依家雖然工作為先，但有合適對象都會想拍拖，不過結婚就未諗。
口述︰Jessica C. 筆錄︰專案組