黃智雯出煮意冧阿媽
「關二嫂」黃智雯雖然惡女角色不討好，但原來是乖女一名，日前她親臨街市落手落腳揀魚揀排骨，準備下廚氹媽咪，期間更被不少師奶認出，大讚她靚女。
無綫小花黃智雯（Mandy）早前在劇集《缺宅男女》中飾演「關二嫂」，雖然性格霸道乞人憎，但觀眾愈鬧愈愛，人氣急升的Mandy再在新劇《On Call 36小時》中扮演與家姐楊怡爭仔的「美雪」，似乎不怕扮演不討好的角色！不過，現實中的Mandy其實甚為孝順，更不惜做煮飯妹氹媽咪開心。
揀石斑夠熟手
日前Mandy出席活動後現身灣仔街市，化上淡妝的她戴上黑框眼鏡，孭着環保袋「直闖」凍肉舖，看來與店東十分熟落，她快速地挑選多隻雞翼後，即轉戰隔鄰的豬肉舖，表示要買排骨煲湯，但對方問她要買多少及哪部分的排骨，Mandy即被考起，只搞笑地說：「唔知呀！一條條嗰啲呀！」此時輪到豬肉佬皺晒眉，只好替她揸主意。其後Mandy到魚檔揀大石斑，今次她變醒目，將鮮魚拿上手觀察是否夠新鮮才決定購買。
被讚真人更靚
有肉又有魚，Mandy突然醒起要買飯後果，於是再前往生果舖，期間不少師奶認出她，均表示很喜歡「關二嫂」，又讚她真人比上鏡更漂亮，令一袋二袋的Mandy完全忘記疲累，當堂開心晒！其後她到家品店掃貨，拿起鑊鏟及掃把仔細研究，遠看其身影猶如賢淑妻子一樣！原來當日其母忙於看舖，於是Mandy在附近買餸，準備當晚親自下廚慰勞母親，認真乖女！
文：影視組