馬國明欣然玩翻撻
馬國明（馬明）與胡定欣這對分手情侶，隨住定欣亮相馬明主演的新劇6秒，兩人翻撻傳聞再度炒起，而繼日前定欣公開表示對翻撻一事順其自然後，馬明昨日為新劇宣傳時，亦與舊愛口徑一致，果然心有靈犀！
馬國明、楊怡、羅仲謙、黃智雯昨日齊為新劇《On Call 36小時》到中學宣傳，與學生作籃球賽。穿上皮鞋的馬明，於比賽期間不慎絆到對手跣低，嚇得他雙手作投降狀，謙仔亦混亂間跣倒地上，最終學生隊以18比7大勝藝人隊。
楊怡充當啦啦隊
於劇集內籃球技術了得、百發百中的馬明，原來現實生活中卻完全不懂，他笑指觀眾看到的效果，全靠剪接配合。談到舊愛胡定欣於該劇客串6秒，馬明對此謂：「佢唔係嚟探我班，唔關我事，因為個手術室廠景變咗TVB聖地，所以好多人入嚟睇。（定欣話同你翻撻順其自然喎！）咁都順其自然啦！」更指現時與定欣做回朋友較舒服。
問到是否不排除復合的可能性？馬明謂：「將來嘅事唔知道，話唔定會話我同曾華倩復合呢！都係你哋傳啫！（你哋都冇認過拍拖？）係我緋聞朋友都可以話復合啦！」
腳踏厚底鞋的楊怡在比賽中充當啦啦隊，笑言怕拗柴而不敢上場，對於結局篇當晚因特首選舉延遲半小時播出，她認為整體影響不大，更謂：「特首呢件事好多人關心，又擾攘咗咁耐，所以之後睇埋套劇就完美嘞！」
謙仔唔怕追女星
至於謙仔被問到會否抱住緋聞女友楊怡入籃？他笑笑口謂：「我又要攬住個波，邊有咁多隻手抱住佢呀！」及後他現身電台活動，對於在比賽時屁股落地，笑指傷勢並不嚴重，不用向楊怡報告。問到是否追求對方，他謂：「冇呢回事。（佢追你？）都冇，好朋友，正常朋友。（之前同女星傳緋聞，依家仲敢拍拖？）時間會過去，依家唔會同人講咁多笑，不過都唔怕追女星。」
文：影視組