Mr.表面風光 Ronny踎劏房

香港樓價高企，普通市民根本無力買樓，近年更有劏房應市以供普羅市民租住，早前無綫劇集《缺宅男女》已經引起師奶共鳴，其實藝人也如升斗市民一樣，並不是人人居者有 其屋，尤其是近年唱片業市道低迷，銷量受網上非法下載和盜版影響，做歌手好多時只是表面風光，就算當紮的樂隊Mr.，又開騷又拍廣告拍電影，惟一份人工卻要五個人分，好睇唔好食，難怪五位成員都冇一個是有樓之人！

月租要六千幾

據知，結他手Ronny就是租住港島區的劏房，由於地點位處鬧市，方便他搭車出入工作，故身為歌手的他，不介意成為劏房租客，本報向Ronny求證，他大方承認：「以前同屋企人住新界居屋，入行之後為咗方便做嘢，搬咗去港島區住，但因為啲租太貴，惟有租住劏房，但都有200呎，有獨立廁所，月租要六千幾，一間屋劏咗三間房，都算有私隱，我到依家都未見過同屋嘅租客。」

Ronny住劏房，結他及畫照等也要分別放在床及梳化上。

放大圖片

由於夾band辛酸，一份收入要五個成員平均分，無奈比其他歌手賺得少，Ronny說：「夾band的確冇一般artists收入可觀，我哋係平均分錢，以前自己做marketing有二萬幾一個月，依家賺嘅錢差唔多，不過收入唔穩定，有時會賺多啲錢，但我覺得都OK，其實自己過嘅都係普通人生活，好嗰啲artists咪風光囉，但有幾多人好似陳奕迅咁出名搵咁多錢。」

Ronny唔覺失禮

身為歌手，Ronny不介意被人知道住劏房，他笑說：「我都係普通人，唔覺得太大問題，唔會覺得失禮人，又唔係打家劫舍，女友都唔介意，我只係想方便自己至搬出嚟住，其實自己都想搬大啲，因為依家住嗰度冇廚房，但我好鍾意煮嘢食，不過要儲錢至搬到屋。」

Ronny坦言無力買樓，批評香港樓價太貴：「樓價真係好過分，以正常普通市民嚟講，大部分人都買唔到樓，自己都想儲錢供樓，但可見將來都買唔到樓，我好想喺港島區買層樓，但200呎都要成二、三百萬，真係冇能力。」

採訪：音樂組