周柏豪遭群模胸襲 側身避釘
周柏豪前晚與鄭融出席時裝騷，面對一眾真空兼「飛釘」模特兒在面前行來行去，柏豪表現得極不自然兼不敢正視，兩人與模特兒影大合照時，柏豪「硬晒軚」不敢亂郁，穿上六吋高踭鞋的鄭融仍淹沒人群中，相當搞笑。
周柏豪與舊同事鄭融老友鬼鬼，前晚齊齊以嘉賓身份出席「CABANE de ZUCCa」時裝騷，由於現場所有模特兒都是真空上陣及「飛釘」，搞到柏豪不敢正視，甚至尷尬頭耷耷；而僅五呎高的鄭融盡力後天補救以六吋高踭鞋示人，可惜高攀不到一眾女模特兒，影大合照時形成「凹」字，甚至幾乎淹沒人堆之中，柏豪更打側企免與模特兒有身體接觸，場面搞笑。
有信心唔會炒魷
鄭融所屬的公司星娛樂早前以「賺唔到錢」向吳日言「炒魷」，如今鄭融密密接騷，她笑說：「我都好努力幫公司搵錢，大家努力啦！（有壓力？）冇，公司冇話要有實際數字回報，定時定候都會約我見面同傾偈。」鄭融對自己充滿信心，相信公司不會炒她魷魚。
祝福師妹楊梓瑤
柏豪師妹o靚模「浸大E神」楊梓瑤日前炮擊公司不重視她，決定兩個月內找不到合適經理人便退出娛圈，柏豪說：「冇睇報道，曾經同佢做過嘢。（話公司重視藝人部？）唔覺得，公司都要視乎市場上變動作出調節，唔覺公司有問題，冇聽過佢呻，反而我成日呻冇假放。」問到對方退出娛圈會否感可惜？柏豪說：「每個人有自己選擇，Good luck啦！」
文：音樂組