陳嘉桓一人得道累全家

經歷中成長

上年我確實經歷咗好多事，18歲係一個小朋友變大人嘅時間，我喺呢年亦因為經歷多咗而變得成熟，真真正正大個女。雖然有啲事曾經唔開心，既然已經過去，唔擔心被重提舊事，人係要向前望，唔可以停留喺某一個時刻，一定要自我增值，令自己進步。

陳嘉桓加入娛樂圈後經歷多了，人變得成熟。

陳嘉桓今年會努力工作，爭取好成績。

今年會順利

依家我心情OK，過了個好開心嘅新年，同屋企人去咗好多地方，又帶我去睇相、睇八字，相士話我今年會順利，舊年嘅嘢會過去，總之今年我會繼續努力！工作方面我過得好充實，上年試咗好多唔同嘅戲路同角色，又試過反串，今年都想繼續拍多啲戲，有更多新嘗試，咩都想試吓，特別係一啲內心戲，我覺得應該幾有挑戰性。

放大圖片	Rose說現在朋友也不敢跟她行街。

成長係一種經歷，自己入行尚淺，係個新人，仲係個小妹妹，即使上年經歷咁多嘢，都唔會為之前嘅事特別介意同揀角色，最緊要係演出時投入到角色就得。

關係大公開

以前好少提及屋企人，但同媽咪（Ronnie，前經理人）關係公開咗之後，連爸爸同細佬都一樣公開埋，初時我哋都有啲唔慣，當時好多人唔信我媽咪係我媽咪，而爸爸因為好後生，好多人亦唔信佢係我爸爸，覺得佢係我男朋友！到大家知道真相後屋企人慢慢就慣咗，不過都唔多唔少影響到佢哋，可能因為我同屋企人似樣大家覺得好得意啩。

好似喺新年同屋企人食飯，影相放上微博，到第二日啲親戚打電話畀我話︰「我哋上網就見到你哋啲新聞喎。」吓？我覺得有啲突然囉，諗唔到只係普通食餐飯，大家竟然咁有興趣。

甫相上微博

對於一連串負面報道，例如話我細個好壞，屋企人都有唔開心，因為以前發生咗一啲事情，成日煩到親戚長輩，佢哋始終係老人家，會擔心同好驚，所以成日打畀我問有冇事，我真係覺得好唔好意思，明明得自己係公眾人物，依家好似成家都變埋公眾人物咁。

我同屋企人感情一向好好，經過上年嘅經歷，感情變得更加好，特別係依家好興甫生活相上微博，以前因為屋企人冇曝光都好少甫相，依家反而可以光明正大，好似去睇演唱會、行花市，記者朋友見到媽咪都會叫一齊影張相，哈哈，好似變咗母女檔，屋企人嘅曝光率都好高。不過，咁又舒服啲嘅，因為大家都知道我嘅屋企人，唔使再去隱瞞囉！

描繪性取向

我好少朋友，最friend都係嗰幾個，男性朋友比較少，因為我入行後媽咪管得好嚴，我嘅朋友佢都識，所以佢唔會擔心，但依家反而係我擔心，擔心朋友受到牽連，事關除咗令屋企人有壓力，連朋友都有壓力！我唔明點解藝人各方面都要畀人知，自己係藝人就習慣到，知道點去面對大眾，但身邊朋友就話：「咁耐先見你一次，點解見你就連自己都上埋雜誌！」佢哋會覺得驚咗我，唔敢再同我出街。

只係普通人

我真係覺得唔好意思，因為外界想知我朋友係點，於是起底，結果搞到朋友都驚埋。好似嗰次見到我個朋友係中性打扮，就話我嘅性取向係同性戀，我媽咪都短頭髮啦，唔通當時未知嗰個係我媽咪，就話我性取向咩？我覺得自己唔做嘢時只係普遍人，都想有自己嘅時間。

食極唔肥

有些人天生麗質，食極唔肥，Rose正是這種人，訪問當日她向小記表示趁不用工作，與家人四出遊玩和獵食，笑言短短一星期已食盡省港澳，因此長了不少肉。但小記看見Rose纖瘦的身形，真的不能相信她如此擦得，真是羨慕死一班港女呢！

筆錄︰專案組

攝影︰黃叔榮

服裝︰IPOSH