Mr.新碟封套又涉抄
樂隊Mr.被傳連環抄歌後，再涉及新碟封面設計有抄襲之嫌。昨日有網民將Mr.於本月16日推出的新碟《Misterdays》，與已於2月解散的日本樂團東京事變於04年推出的日文細碟《群青日和》作比較，指兩碟的封面相設計近乎同出一轍，同是以單色作底色、5位成員並肩而坐，眾人眼神、焦點各異，一樣有張長餐枱及枱面放滿物件。
發誓冇抄
Mr.成員Dash看過兩張唱片相後，否認做了「copy cat」，昨日他在電話中回應：「我覺得唔似喎，我哋張係暖色tone，但佢哋係冷色。（但感覺好似喎？）如果夾硬話抄，只可以話都係有5個人囉，我好信得過負責設計嘅饒舌樂隊LMF成員阿庭，佢唔會抄。」
Dash說新碟相的「主角」，其實是枱上象徵現在、過去及未來的白陶瓷，問他可感被網民標籤為「抄襲樂隊」？Dash坦言曾為此而耿耿於懷，但現已看化，不再介意流言蜚語。至於設計者阿庭反應較大，他說：「我可以發誓冇抄，我根本冇見過東京事變隻碟，如果話我抄，我覺得最似係5個人都係坐低囉。」
文：音樂組