泳漢誤食泡菜被細佬詐型
李泳豪終於擺脫情傷陰影，展開新戀情，李家上下都為他而高興，搞笑在不知情的哥哥泳漢笑稱怪不得雪櫃多了兩包泡菜。昨日他接受電話訪問說：「我都覺奇怪，泳豪唔食辣，但我喺雪櫃發現兩包泡菜仲食咗，畀佢詐型。依家有新歡，我都要逼供，之前同佢一班女性朋友出過嚟幾次唱K食飯，唔知係咪其中一個。（同劇港姐張秀文追泳豪？）港姐？唔好嘞！見過鬼仲唔怕黑咩！（新歡係中、韓混血兒戥佢開心？）要見過先知，人品好緊要！」
至於泳豪父母很支持兒子重投新戀情而忘卻情傷，施明昨在電話中說：「中、韓混血兒？咪好靚女！（恨飲新抱茶？）都好想見吓，新抱茶就慢慢嚟！我都聽講泳豪有個新朋友，有新戀情就係情傷嘅靈丹妙藥！」至於爸爸李家鼎則稱仔大仔世界：「佢都冇同我講！（恨飲新抱茶？）唉，先前諗住飲都冇啦！」