張智霖拜師阿叻 預習做馬主
張智霖昨日以「打吡大使」身份出席馬壇盛事「Mercedes-Benz香港打吡大賽」活動，對於將有機會做馬主，他表現興奮說：「最大樂趣莫過於同一班朋友諗吓隻馬叫咩名同着咩衫。（你哋班朋友有冇城城份？）有o架，大家傾時都搞出好多笑話。其實我哋成班朋友好多時都一齊去旅行，如果可以一齊揀馬匹就更加開心，（會唔會用歌名例如『骨膠原』命名？）骨膠原個名好蹺口，我怕好似講粗口咁！」
狂睇資料惡補
此外，張智霖又自爆曾拜陳百祥為師，他說：「嗰時好認真o架，斟晒茶咁，不過佢畀咗一大疊資料我，我放咗喺屋企冇睇過，我諗依家要惡補番先得！（會唔會用個仔魔童嚟命名？）我驚啲人以為係王維基（電訊魔童）。」而對於好友郭富城近日與熊黛林的戀情報道，他謂：「近排大家都各自忙拍戲。」
揸新車接老婆
另外，前日袁詠儀帶同愛子魔童及一名女友人於中環行街，孭住小背囊的魔童紮紮跳狀甚活潑，及至發現有記者，靚靚一手抱起囝囝，被問到帶囝囝去哪裏玩，靚靚說：「無呀！我哋去買啲嘢啫！」至於問到老公張智霖，靚靚直言：「佢揸緊車呀，過緊嚟接我哋。」未幾三人步行到商場外，只見張智霖揸住落地僅四日的白色Fiat新車來到，由於車仔細細，靚靚上車時更要側晒身，一度露出辛苦表情。
文：名人組、追蹤組