梁小龍轟星爺食水深

有不少藝人跟星爺合作過後，最終都不歡而散，包括兩位「星女郎」黃聖依、張雨綺關係更要鬧上法庭，前者雖有緋聞男友楊子賠錢了結官司，但黃聖依與楊子不時在公開場合翻舊帳，力數星爺旗下經理人公司「星輝」不是，而後者張雨綺則仍在打官司。

遺失合約呻離譜

除了兩位「星女郎」與星爺鬧不快外，早年憑電影《功夫》火雲邪神一角，令觀眾留下深刻印象的梁小龍，原來亦跟星爺反面收場。雖然事情已成過去，但梁小龍仍未釋懷，友儕間一提起星爺，他便會即時「着燈」力數不是！

「星女郎」黃聖依為擺脫星爺，獲緋聞男友楊子賠錢了事。（資料圖片）

昨日身在巴黎的張雨綺，與星爺的官司仍未完結。（中新社圖片）

記者致電梁小龍，談到他與星爺之恩怨，他表示：「當年係佢（指星爺）親自打畀我叫我簽佢，我起初都有猶豫，但見佢咁有誠意，又話會幫我傾外國公司，最終都應承咗，簽咗3年合約，點知佢哋公司抽佣抽到好似『海鮮價』咁，仲係抽好多，真係好過分！我同佢公司啲高層食飯，想睇番份合約，佢哋竟然同我講唔見咗！」

「人食人嘅世界」

梁小龍揚言因之前已跟星爺講好，若合作得不開心，便會提前解約，故他跟星輝合作1年便提出解約，對於不歡而散，梁小龍依然氣憤難平：「以為佢（指星爺）係紅褲仔出身，會明白演員嘅苦況，點知唔係嗰回事，抽佣抽得咁犀利！佢係叻人嚟嘅，一個好叻投機嘅人，依家係人食人嘅世界，我蠢先畀人食啫，當攞個經驗囉！」

對於梁小龍的兩宗指控，星輝公司發言人表示：「抽佣係依足合約列明咁去抽，唔會有海鮮價，至於唔見合約，更加無可能，佢隨時都可以攞番合約複印本，（梁小龍提前解約？）冇啲咁嘅事，係夠期完約。」

至於當年有份傾梁小龍簽星輝的田啟文，亦表示梁小龍抽佣價錢依足合約，而遺失合約亦機會很微，如梁小龍有需要，他雖已離開星輝，但仍十分樂意幫對方向星輝拿回複印合約。

事業大起大落

今年64歲的梁小龍於七十年代拍過超過40部電影，直至81年在麗的劇集《大俠霍元甲》中飾演陳真一角，成為其演藝生涯的代表作，並憑此角而風靡內地，當年曾有傳梁小龍返內地時，農民見到他激動痛哭，因他們以為梁小龍被日本人害死！

走紅後梁小龍接拍超過10部電影，演出88年的《猛鬼醫院》後便無以為繼，更被拍得要以送外賣工作維生。直至04年被周星馳賞識接拍電影《功夫》飾演火雲邪神一角，梁小龍再度「翻叮」並再食老本再接拍關於陳真的劇集，以及接拍《打擂台》等電影。感情方面，梁小龍曾和七十年代歌手黎愛蓮結婚，但離婚收場，黎於79年遇襲遭人以鏹水毀容，梁小龍即動用大筆積蓄作為醫藥費。

文：影視組