楊怡抓撈孖謙仔 打折搵銀
緋聞男女楊怡、羅仲謙於活動中互笠高帽、打情罵俏，楊怡讚謙仔靚仔，謙仔又讚她是實力偶像派靚女。之前二人被本報影到BBQ，楊怡乘機𢱑撈說：「最近金錢上鬧『饑荒』，若果有BBQ店開幕，可以搵我哋剪綵。」
楊怡、謙仔、馬國明、黃智雯等昨出席《On Call 36 小時》的宣傳活動，宣布上周平均收視達30點，最高33點，一對緋聞男女受訪時不時互相吹捧、打情罵俏。
現一劇接一劇的謙仔，否認已在電視站穩腳：「不過今次係最有成功感，喺街都有人叫我劇中花名。」是否與楊怡傳緋聞帶動好收視？楊怡即笑言：「乜有啲咁嘅嘢咩？我向來係實力派。」在旁的謙仔即指自己是偶像實力派，二人更互笠高帽，謙仔說：「我要跟楊怡學習，佢係實力偶像派靚女。」楊怡即時「回禮」讚他是靚仔。對劇集反應佳會否再合作，他們說要問監製，毋須太刻意。
金錢「饑荒」
楊怡又自爆最近金錢上鬧「饑荒」：「所以無綫開電視劇我都會拍。（同謙仔情侶檔？）無論係唔係，出嚟你哋都話我哋情侶檔啦！如果有BBQ場開幕請我哋做剪綵嘉賓，價錢有得傾，可以打個折。」至於謙仔被問到有否向楊怡使出劇中的「冧女」招數？他揚言未有「出招」，楊怡即叫他「偷師」：「如果現實生活中有個男仔咁浪漫，都好sweet，不過我唔係鍾意浪漫，我鍾意爆！」記者笑言楊怡應勸謙仔簽無綫做經理人，兩人會有更多合作機會，楊怡謂：「如果我係佢經理人，我會叫囉！」
至於劇中與楊怡一對的馬國明，被指遭謙仔奪去另一半時，他笑謂：「佢唔擸得好耐，叫佢行埋一邊，網上啲反應都期待我同楊怡一齊。（人哋現實生活中一齊喎。）我唔理，不過我唔知佢哋現實生活係唔係，睇唔到蛛絲馬迹。」
另外，廣管局亦錄得《On Call》劇有一宗投訴，指劇集稱頌公立醫院醫生，有誤導巿民之嫌。
文：影視組