劉倩婷「丞」風破浪幸福在望

愛情篇：

Sandy最令人印象深刻的，莫過於與堪輿學家李丞責的戀情，在去年才宣布拍拖的二人，感情突飛猛進，更在上月接受了男友求婚，成為龍年新娘子。

其實我哋一路都有傾結婚，不過就冇講幾時。大年初二嗰日係我生日，佢book咗架遊艇，請晒屋企人同朋友一路邊睇煙花、一邊陪我過生日。佢突然拎咗99支玫瑰出嚟，然後跪喺度同我求婚，搞到我都感動到眼濕濕。

劉倩婷大讚未婚夫李丞責有腰骨、有膊頭。	放大圖片	劉倩婷從港姐進身娛樂圈，亦經歷過一番波折。

患難見真情

可能我之前同佢講有煙花求婚好sweet，所以佢記得。我覺得佢係一個可以付託終生嘅對象，既然鍾意，我就覺得唔好等，至於生小朋友，我覺得依家講仲係言之尚早，我點都會結咗婚之後先生。

同佢最難忘嘅事？好記得認識咗佢兩、三個月，我哋仲未一齊嘅時候上咗雜誌封面，雜誌仲影到我、我媽媽同佢同車，亦有一啲負面新聞出咗嚟，我相信一般人如果遇到呢啲事都會避之則吉，但佢為咗保護我，就出嚟同傳媒講，佢已經同太太分開咗，當時我好感動，真係患難見真情！

後父最後歲月 家庭篇

Sandy在三歲時父母已經離異，加上她的後父在09年時過身，令她大受打擊，不過她非常堅強，態度積極，更學懂了珍惜眼前人。

三歲嘅時候，父母已經分開，媽咪就負責賺錢供書教學，當時佢成日都教我要樂觀、獨立，仲要學習珍惜擁有嘅嘢！

教識做人態度

至於後父，我細細個已經同佢相處，所以我當正佢係我親爸爸一樣，當時知道佢有病，我個心都好痛，立即放低手頭上嘅工作陪佢度過最後一個月，佢係一個好有責任心、好重視家庭嘅人，佢教識我好多嘢，尤其做人嘅正確態度。

依家雖然工作好忙，但都會抽時間陪媽媽，有時帶佢食吓飯、傾吓偈，分擔吓茶餐廳嘅事務。

「番書妹」驚講中文 事業篇

從參選「香港小姐」到轉型成為一位藝人，Sandy並非一帆風順，對每事都要求完美的她，就因「中文唔鹹唔淡」而飽受困擾。

能夠成為香港小姐係一生中最大嘅殊榮，即使卸任後，我都希望可以繼續宣揚香港。其實當時參選港姐除咗希望擴闊視野之外，亦希望完成Daddy嘅遺願。

參選港姐後，有好多演出機會，例如喺未卸任前，我試過做《東張西望》主播，不過做咗兩集之後就毅然退出咗。

唔想令人失望

我係一個對自己要求好高嘅人，乜嘢都要做到最好！但畢竟喺外國讀咗書咁耐，中文真係唔鹹唔淡，加上節目係live，所以真係唔想令人失望。

我覺得自己始終太新，需要練好中文同口才先可以接受呢個機會，我好希望遲啲可以有機會參與大型司儀嘅工作，又或者參與介紹香港美食、文化、傳統嘅節目，繼續宣揚香港！

後記：

常常說香港小姐是美貌與智慧並重，但小記認為愛心亦是很重要的一環，而從劉倩婷身上，就可以體驗這一點。父母的離異讓她明白幸福並非必然，更讓她養成了樂於助人的性格，例如她會捐錢予難民和供養非洲兒童。她說：「錢只係一個數字，好多嘢係金錢衡量唔到，如果我有錢，我都會去幫人！」

口述：劉倩婷

筆錄：專案組

攝影：劉智源

服裝及場地：Harvey Nichols

化妝：Frances Ho

髮型：Calvin Tsoi@Hair