文頌嫻龍B陪嫁 豪搞百萬婚禮

文頌嫻（文女）與拍拖3年、同樣35歲的商人李梓慎（Jason）昨晚在四季酒店筵開28席大宴親朋，並進行註冊儀式，婚禮豪花7位數！星級好友如郭可盈、林文龍、陳煒及張文慈等均有到賀，視后佘詩曼、周家蔚、湯盈盈、姚樂怡及關寶慧等則為文女組成9人姊妹團，兄弟團則為圈外人。

晒兩卡鑽戒

席間，文女與老公攜手切蛋糕及錫錫晒恩愛，順道大晒近兩卡的鑽戒，更即席公布「雙喜臨門」，文女說：「我哋成功造人喇！之前怕BB小器先冇講，依家過咗3個月，好開心可以同大家講我有咗！」已屆熟女之齡的她笑言因趕時間而將結婚與造人同步進行：「你哋（指記者）唔覺我成日用個花球遮肚咩？老公想生4、5個，自己就想生一仔一女湊夠個『好』字！」為了貪靚，腹部微隆的她堅持以5吋高踭鞋上陣：「我出入都會有人傍實。（敬酒點算？）飲假酒囉！」

放大圖片	文女和丈夫由有不少藝人組成的星級姊妹團傍住切結婚蛋糕。	姚樂怡與新娘趁空檔玩自拍。

取消接新娘

問到如何獎勵老婆「雙喜臨門」，Jason說：「錫佢多啲囉！」文女冧說：「拍拖初期佢已經問我鍾唔鍾意小朋友，如果我當時答唔鍾意應該會畀人飛，哈哈！」並指因擔心體力未能負荷，決定改往東南亞度蜜月，而昨早亦不安排「接新娘」環節，不過玩新郎環節已早在單身派對時已完成。她笑着說：「姊妹話今晚（昨晚）會再玩新人，我哋都做足安全措施！」Jason即搭嗲：「好驚畀文女啲姊妹玩，佢哋唔係人咁品！」聽到新郎「讚」盈盈玩得「最狼」，文女在旁踢爆盈盈最叻「隊人」，更會待對方出嫁時「報仇」：「盈盈應該喺我生完B就嫁，唔會太遲。」

文：影視組