楊汀叮向GaGa求簽
當全城勁撲Lady GaGa香港演唱會門票，o靚模Angelababy師妹楊汀叮卻轉掃Lady GaGa黑膠碟，更秘密飛往加拿大集齊心頭好！為表興奮，汀叮將黑膠碟鋪滿身上拍照晒冷，但卻否認向早前狂拎40張演唱會門票晒命的王賢誌挑機。
08年已加入GaGa迷行列的汀叮，由於本身是黑膠碟發燒友，甫知道GaGa會於五月來港開騷，即做足準備迎接偶像，除一早託人內部認購$1,580貴價門票外，還暗地裏豪擲萬多元飛往加拿大撲齊GaGa全套黑膠碟，夢想睇show當日可拿給偶像簽名。
行足四日
一口氣撲齊17張大黑膠碟及細黑膠碟的汀叮，拍照當日興奮得將所有碟鋪在身上「晒冷」，感覺像向早前狂拎40張演唱會門票自拍晒命的王賢誌挑機！問她是否有心向王賢誌下戰書？汀叮即解釋謂：「咁又唔好咁講，大家各有所好，我鍾意黑膠碟夠永恒。」
談到該批黑膠碟，汀叮笑着大讚價錢相宜，由200至300港元不等，其中以《The Fame Monster》的圖案碟最難撲：「為咗呢批碟，我足足行咗4日唱片舖，一見到有就執。最好彩係去到最後一間，佢知我搵緊GaGa啲黑膠碟，即刻自動請纓幫我執齊晒搵唔到嗰啲，否則無咁順利可以咁短時間搵得齊，香港我直情無見過有。」
港騷嗌抵
汀叮又指GaGa的演唱會門票雖要千多元，但其實價錢算蠻便宜：「喺加拿大睇最貴嘅飛要成350蚊加紙，即係二千幾蚊一張飛，咁你話香港係咪抵呀？」
文：影視組